Usa ka barkong bugas ok ang papeles apan di pa gihapon i-release sa Boc-Cebu

CEBU, Philippines - Dili pa ma-release sa Bureau of Customs-Cebu ang 16,000 ka sakong bugas nga gikarga sa MV Queen of Joy samtang duna pay mga pagsusi sa mga dokumento sa kargamento ug ang resulta sa gihimong laboratory test sa sample sa bugas.

Matud pa ni Rico Rey Holganza, ang hepe sa Law Division sa maong ahensiya kompleto ang dokumento nga gisumitir sa Philippine Phosphate Fertilizer ug mahimo na gyud unta nga ma-release ang maong kargamento.

Apan dili pa nila kini mahimo kay wala pa mosumitir ang Enforcement and Security Service o Customs Police sa ilahang findings.

Ang ESSC misumitir og samples sa bugas ngadto sa International Rice Research Institute sa Manila aron tan-awon kung lokal o imported ba ang maong bugas.

Ang Philphos mao ang consignee sa maong kargamento nga dad-on unta sa Isabel Leyte.

Ang mayor sa maong lungsod nga si Mayor Marcos Gregorio Cerillo miingon nga dili smuggled rice ug alang unta sa mga biktima sa bagyong Yolanda ang maong mga bugas.

Apan tungod kay wa dayon makapresentar og dokumento ang maong barko sa ilang kargamento gi-hold kini ug gipangitaan og certificate of donation nga gikan sa Department of Social Welfare and Development ug Shipping Permit sa National Food Authority. (Mitchelle Palaubsanon/EIM)

Centcom bag-o na ang hepe

Ang outgoing nga hepe sa Special Operations Command of the Armed Forces of the Philippines nga si Maj. Gen. John Bonafos mao na karon ang bag-ong commander sa Central Command.

Kini human nga si Lt. Gen. Roy Deveraturda ibalhin isip commander sa Palawan-based Western Command (Wescom).

Si Deveraturda milingkod isip commander sa Centcom adtong Abril ug gibalhin gyud unta niadtong Nobiyembre 8 apan tungod sa pag-igo sa bagyong Yolanda si Armed Forces chief Gen. Emmanuel Bautista mioktaba niini.

Si Lt. Gen. Rustico Guerrero, hepe sa Wescom mao na usab karon ang commander sa Western Mindanao Command (Wesmincon) sa Zamboanga City. Siya mihulip kang Wesmincon chief Lt. Gen. Rey Ardo kinsa miretiro na adtong Nobiyembre 9.

 â€œThis is a lateral movement of all the ordinary soldiers in which our role is to secure our interest in different place of the Philippines and every assignment has an equal.

Sa iyang bahin si Bonafos miklaro nga iyang ipadayon ang mga proyekto ni Deveraturda ilabi na ang nagpadayon nga relief and rehabilitation operations.

“Hindi natin bibitiwan ang security concerns as to protect our brothers at pagsumikapan natin na walang mangyari, iwasan na muna ang kaguluhan sa panahong ito kahit na may pag-galaw pa rin sa kabila,” matud niya.

Si Bonafos kanhi camp commander sa Camp Aguinaldo sa wala pa matudlo isip hepe sa Special Operations Command. Siya’y nangulo usab sa 802nd Brigade, 8th Infantry Division ug sa 15th Infantry Battalion.  (BANAT NEWS)