Cabañero gitugpo sa pagka-ABC president

CEBU, Philippines - Si Kapitan Raul Cabañero sa barangay Bulacao, dakbayan sa Talisay nahinangop sa suporta sa Alayon sa pagpili kaniya  nga modagan isip presidente sa Association of Barangay Captain (ABC) sa siyudad.

Matud ni Cabañero nga  daku niya  kining  garbo ug dungog   ug  misaad  nga  kung siya maoy mapiling presidente sa ABC ang usa niyang tumong mao ang kahiusahan sa tanang mga kapitan.

Ang Talisay gilangkuban sa 22 ka mga barangay ug ang ubang mga kapitan mialyado  sa Liberal Party (LP) mayoriya  sa  mga  kapitan anaa  sa Alayon.

Tungod  sa  iyang respeto kang Mayor Johnny De los Reyes kinsa alyado sa LP si Cabañero miingon nga bisan  dili siya kaalyado sa mayor apan  maayo ang ilang relasyon.

Sa laing  bahin  gibutyag  ni Cabañero nga dili tinuod  ang  mga  balita  nga  may mga  kapitan  nga sakop  sa Alayon  nga  mobalhin  ngadto  sa LP. Kini  tungod  kay  alang  kaniya sayon kaayo ang pagmugna og estorya apan lisud  pamatud-an.

Sa laing bahin, si Talisay City councilor Dorotheo Emit nga kaalyado sa Alayon nagkanayon  nga angayan si Raul nga mapiling presidente sa ABC. Gibutyag ni Emit nga si Cabañero kinsa iyang giidolo mihatag  kaniya og mga ideya kaniadto  bahin sa proyekto   nga  angay sa barangay   sama  sa  pagbutang og day care center ug uban pa.

Misaad  usab  si Emit  nga  magpabilin siya  nga  dili  matarug  sa partido  Alayon. (BANAT NEWS)