CEBU, Philippines - Ang kapolisan sa dakbayan sa Talisay padayon sa ilang operasyon sa pagpangita sa suspetsadong mituok patay sa usa ka katabang niadtong Biyernes sa buntag sa BF Homes Subdivision, barangay Lawaan I, dakbayan sa Talisay.
Si Superintendent Resty Santos, officer-in-charge sa Talisay City Police Station nagkanayon nga gipanid-an nila karon ang suspetsadong si Edsel Deiparine.
Si Deiparine maoy suspetsado sa pagtuok patay kang Mary Jane Apaap Parame.
Ang maong pagtuok nahitabo sulod sa banyo sa balay sa amo ni Parame nga si Teresita Gabison.
Matud ni Santos nga padayon usab ang ilang imbestigasyon sa motibo sa maong hitabo.
Giingong nanguyab kang Parame si Deiparine apan matud ni Santos nga ila pang susihon ang tinuod nga hinungdan nganong gipatay sa suspetsado ang biktima.
Sa laing bahin, si Inspector Rogene Fodutan kinsa maoy nangulo sa imbestigasyon mibutyag sa Banat News nga si Deiparine ug ang igsuon niini suod sa pamilyang Gabison ug gitrato silang sama sa mga anak ni Mrs. Gabison hinungdan nga makabisita sila sa balay sa naulahi.
Matud ni Fodutan nga ilang giadto sa gitrabahoang beauty salon sa Colon, dakbayan sa Sugbo si Deiparine apan wala kini motungha.
Si Deiparine giingong gitawagan usab kini sa iyang igsuon aron moatubang sa mga polis apan putlon niini ang tawag.
Dugang ni Fodutan nga naghuwat sila tibuok adlaw niadtong Biyernes nga mopatim-aw si Deiparine ug moatubang kanila apan wala gyud mopatim-aw. (BANAT NEWS)