Bonifacio day gisaulog sa Mandaue

CEBU, Philippines - Gisaulog kagahapon sa kagamhanan sa dakbayan sa Mandaue ang ika-150 nga kasumaran sa adlaw nga natawhan ni Andres Bonifacio nga giilang Supremo sa Katipuneros nga  natawo niadtong Nobiyembre 30, 1896. Si Mayor Jonas Cortes ug Bise Mayor Glenn Bercede  maoy  nanguna  sa maong  kalihokan.

Uban  usab  sa  mga sakop sa konseho nga naglakip kanila ni Konsehal Emmarie Lollipop Ouano-Dizon, Konsehal Diosdado Suico, Konsehal Jimmy Lumapas, Konsehal Elston Dabon, Konsehal Editha Flores Cabahug ug mga kauban  nga mitambong  sa flag raising ceremony nga  gipahigayon.

Si Association of Barangay Federation (ABC) President  Ernie Manatad maoy  nangulo sa mitambong nga barangay kapitan uban usab sa mga konsehal sa 27 ka barangay sa maong dakbayan.

Dugang nga mitambong sa maong kalihokan mao ang mga kawani sa kagamhanan, mga magtutudlo ug mga tinun-an isip paghandom kang Bonifacio sa adlaw niyang natawhan nga giilang bayani sa katawhang Filipinhon.

Ang flag raising ceremony nga gipahigayon gihatagan  og  gibug-aton  ang  paghalad  og pongpong sa mga bulak sa  monument  ni  Bonifacio nga gipahimutang sa atubangan sa Rizal Bonifacio Memorial Stage sa barangay Centro sa maong dakbayan.

Sa nasayran base sa kasaysayan nga si Andres Bonifacio nga natawo sa Nobiyembre 30, l896  o 150 na ka tuig ang nakalabay  maoy anak sa magtiayong Santiago Bonifacio ug Catalina de Castro busa  gipistahan  ang  maong  adlaw  sa   San Andres de Apostol.

Dugang nasayran nga kaniadto  ang matag Nobiyembre 30 sa matag tuig gihimo lamang nga Andres Bonifacio Day apan giusab na kini ngadto sa National Heroes Day pinaagi sa giaprobahan nga balaod nga  Republic Act 2946 niadtong Pebrero  16 sa tuig 1921   sa paghatag usab og pasidungog kang Andres Bonifacio. (BANAT NEWS)