Usa ka barkong bugas nga gipugngan sa BOC-Cebu di smuggled rice–Mayor

CEBU, Philippines - "Dili intawon na sa smuggle ang bugas, para intawon na sa among katawhan sa Isabel, Leyte." Mao kini ang pamahayag ni Isabel, Leyte Mayor Marcos Gregorio Cerillo ngadto sa Bureau of Customs-Cebu human gi-hold ang usa ka barko nga adunay 15,997 ka sakong bugas.

Si Ramon Tan, ang presidente sa Association of Barangay Captains sa maong lungsod nagkanayon nga ang maong kargamento dili smuggled. "Ang bugas para gyud sa taga Isabel, Leyte. Nihapit ra ang barko sa pag-unload sa bugas pero dili sad tanan para anhi i-repacked kay dili masulod ang tanang bugas sa warehouse sa Philphos," matud pa ni Tan, kinsa usab ang bise presidente sa Philphos port operations.

Ang Philphos maoy consignee sa maong kargamento. Dugang pa ni Tan nga gawas sa pagdiskarga og pipila ka sakong bugas aron i-repack, ilaha usab kuhaon ang 12,000 ka mga relief packs nga gikan sa opisina ni Senator Alan Peter Cayetano nga naa sa Cebu alang sa taga Isabel, Leyte ug sa silingang munisipyo.

Dungag pa ni Tan nga dili lang kini mao ang higayon nga ang Philphos ug ang opisina sa maong senador nga nitabang sa maong lugar.

"Kung wala pa nitabang ang Philphos ug si Senator Alan nga niadto gyud sa Isabel, Leyte, ambot lang pwerte na tingaling gutoma sa katawhan didto," matud pa sa mayor.

Nanghinaot ang mayor ug si Tan nga i-release na unta sa BOC  ang maong kargamento kay daghang katawhan ang nagpaabot niini.

“Ako na ning gi-announce last week pa nga dili sila angayan mahadlok nga magutman kay adunay usa ka barkong bugas nga moabot. Among gihangyo ang opisyales sa Customs nga unta i-release na nila ang bugas," apelar pa sa mayor.

Ang Isabel, Leyte nga adunay 40,000 ka mga residente nga apektado sa bagyong Yolanda, mokunsumo kini og 500 ka sakong bugas matag adlaw ug ang maong kargamento gibana-bana nga molungtad hangtod usa ka buwan. Ang duha ka opisyales nituyo lang gyud og anhi sa Sugbo aron mapadayag sad ang ilang habig kabahin sa maong kontrobersiyal nga kargamento.

Ang BOC-Cebu mi-hold niini ug gipangitaan og dokumento ang consignee niini. (BANAT NEWS)