CEBU, Philippines - Wa igsapayan ni kanhi kongresista Eduardo Gullas ang pagtapon ni konsehal Dennis Basillote ngadto sa Liberal Party.
Matud ni Gullas nga girespeto niya ang desisyon ni Basillote sa iyang pagtapon ngadto sa laing kampo.
Kahinumduman nga niadtong Martes, si Basillote mideklara na kining motapon ngadto sa LP ug mihural ngadto kang Gobernador Hilario Davide III kinsa maoy provincial chairman sa LP.
Si Basillote miangkong nahiubos kini sa mga Gullas tungod kay giingong gisuportahan nila ang kaatbang sa iyang anak sa milabay’ng barangay elections.
Si Rex Basillote mikandidato kini isip kapitan sa barangay Dumlog sa milabay’ng eleksiyon sa barangay apan napildi sa iyang kaatbang nga si Nelson Abellana. Si Gullas miingon nga nananghid siya kang Basillote sa iyang pagduol kang Abellana. (BANAT NEWS)