CEBU, Philippines - Napakyas ang 25 porsiyento nga kandidato alang sa pagka-opisyal sa barangay sa dakbayan sa Mandaue pagsumiter sa statement of donation and expenditure ngadto sa buhatan sa Commission on Election (Comelec) human sa barangay election niadtong Oktubre 28 niining tuiga. Kini ang nasayran sa Banat News kang Comelec Election Officer Atty. Ann Fleur Gujilde nga nahinabi kagahapon.
Si Gujilde miingon nga ila na nga gihandos ngadto sa Comelec ang kuwentada sa nagasto sa mga kandidato.
Lakip na ang listahan sa mga donasyon nga nadawat sa tanang kandidato sa barangay sa miaging piniliay.
Ang deadline nga gitakda sa Comelec alang sa maong gimbuhaton hingpit na nga napupos niadtong Nobyimbre 27 niining tuiga.
Gitataw niya nga ang mga kandidato sa miaging barangay election nga napakyas sa pagtuman sa lagda sa Comelec midaug man o naparot, ilang giawhag nga ideretso na lang og handos ngadto sa ulohang buhatan sa Comelec sa Manila.
Gipasabot niya nga ang maong mga kandidato nga napakyas sa pagsumitir sa ilang statement of donation and expenditure sa miaging piniliay pahamtangan og multa .
Unya iyang gitataw nga dili na sila tugotan nga makatrabaho pa ubos sa payroll sa kagamhanan.
Ang mga nakalapas usab sa maong balaod dili makalingkod sa katungdanan.
Kini tungod kay ang buhatan sa Department of Interior and Local Government (DILG) mopakita sa certificate of compliance sa ilang statement of donation and expenditure sa miaging piniliay.
Si Gujilde miingon nga ang pagsumitir sa maong dokumento ngadto sa ilang buhatan human sa piniliay gikinahanglan gayud nga tumanon sa tanang kandidato.
Ang line-up sa mga kandidato sa pagka barangay konsehal o pagka barangay kapitan naparot man o nakadaug kinahanglang motuman gayud sa maong pamaagi. (BANAT NEWS)