BFAR manghatag na og makina sa pump boats ug gamit sa panagat

CEBU, Philippines - Magsugod na sa pagpang apud-apod ang Bureau of Fisheries and Aquatic Resources-7 og libreng makina sa mga pump boats sa mga lungsod ug siyudad sa amihanang Sugbo nga naigo sa kabangis ni super typhoon Yolanda.

 Matud pa ni Alma Saavedra, ang information officer sa BFAR-7  nga 193 ka mga pump boat engines (5.5 horse power) ang ilang ipanghatag sa mga mananagat.

Gawas sa mga  pump boat engines, manghatag usab ang BFAR-7 og mga fishing accessories sama sa nets, floaters, sinkers ug uban pa.

Apan giklaro ni Saavedra nga ang mga mananagat lang nga narehistro ubos sa ilang programa nga Municipal Fisherfolk Registration mao ang prayoridad.

 Sumala pa sa record sa BFAR dunay kapin  6,000 ka mga mananagat sa Northern Cebu ang nabiktima sa maong bagyo sa nahisgutan nga mga lugar. (BANAT NEWS)