CEBU, Philippines - Ang nasud sa Australia mihatag og 1,000 ka mga family tents sa Pilipinas alang sa mga biktima sa bagyo nga Yolanda pinaagi ni Australian Ambassador to the Philippines Bill Tweddell sa miaging adlaw sa Mactan Benito Ebuen Air Base sa dakbayan sa Lapu-Lapu. Ang maong mga tents gidawat sa Department of Social Welfare and Development ug ni Central Command Commander Roy Deveraturda.
Ang mga tents ipang apod-apod sa mga naapektahan sa bagyo sa habagatang Sugbo ug sa Eastern Visayas.
“Food, water, and health of the people affected by typhoon Yolanda remain pressing priorities but the initial focus in those areas is giving way to one of the other priority areas for the Philippine Government like shelter,†matud ni Tweddell.
Siya midugang nga ang mga tents temporaryo lang nga solusyon ug kabahin sa kinatibuk-ang tabang sa Australia sa nasud. Gawas sa Australia nanghatag usab og susamang mga family tents ang nasud sa United Kingdom, Taiwan ug China.
Ang UK mipadala og mga shelter boxes nga dunay sud nga tents, solar lights, ug uban pang survival kits. Gipaabot nga ipanghatag ang tibuok box kada pamilya nga nabiktima sa bagyo nga hangtud karon wala pa makapabarog pagbalik sa ilang mga panimalay. (BANAT NEWS)