Usa ka barkong bugas gi-disguise nga relief goods?

CEBU, Philippines - Gidudahang 16,000 ka sakong bugas nga gikarga sa usa ka inter-island nga barko ang gipa-hold una sa Bureau of Customs-Cebu tungod sa pagdudang gi-disguise kini nga relief rice alang sa mga biktima sa bagyong Yolanda.

Ang BOC-Cebu nangayo karon og sertipikasyon gikan sa consignee niini gikan sa Department of Social Welfare and Development ug shipping permit sa National Food Authority sa pagbiyahe sa maong mga bugas.

Matud pa ni BOC-Cebu district collector Roberto Almaden nga wala pa nakasumitir sa maong mga dokumento ang consignee.

Si Atty. Dante Maranan, ang chief legal officer sa BOC-Cebu nagkanayon  nga posible nga maluwatan og "warrant of seizure and detention" ang maong kargamento nga gisakay sa M/V Queen of Joy kung dili makapresentar og dokumento ang consignee nga Philphos.

"We will issue WSD once they failed to submit the document tomorrow or maybe until Monday next week," matud pa ni Maranan nga nahinabi sa Banat News kagahapong adlawa.

Ang maong kargamento  nga may gibanabana nga mokantidad og P23.9 million nga kantidad  sa presyo nga P1,500 kada sako.

Matud pa nga  gikan sa Manila ug padulong unta sa Isabel, Leyte ang maong barko apan gikahibulong sa BOC-Cebu nga gi-divert kini sa Cebu.

"Possible nga smuggled rice ni pero di pa ta kasiguro gyud. Kay para man daw ni relief goods unya anhi repack  sa Cebu. That's why we asked the consignee to submit the certification from DSWD and NFA shipping permit," dugang pa ni Maranan.

Bag-ohay lang nidonar ang BOC-Cebu og 5,500 ka sakong bugas nga ilang nadakpan ning tuiga ngadto sa DSWD-7 alang sa mga biktima sa bagyong Yolanda. (BANAT NEWS)