Mayor sa Talisay gibaharang ireklamo sa abogado

CEBU, Philippines - Mibahad ang  usa  ka  molupyo  nga ireklamo nila  sa abogado ang  ilang  mayor  sa dakbayan  sa Talisay. Kini  dihang   nasuko  ang  usa  sa  mga  anak  sa namatay  batok  sa ‘100 days accomplishment ni Mayor Johnny De los Reyes’ ang hulagway niini kabahin sa programa sa siyudad sa libreng lungon ug lubong alang sa mga kabus.

Si Wilfredo Velarde, hingkod, taga barangay Poblacion, Talisay kinsa anak sa namatay nga si Flora Velarde, 79, mibutyag sa mga tigbalita nga nasuko ang iyang igsuon nga nurse nga  nagtrabaho sa laing nasud sa nakita niini sa social media nga hulagway sa mayor  sa kilid sa  haya sa ilang inahan  uban sa  caption  nga “ Karon Libre Nang Lungon ug Gasto Pagpalubong”.

Matud ni Velarde nga gipangitaan sila sa iyang igsuon kung asa paingon ang kwarta alang sa lungon, haya ug pagpalubong sa ilang inahan tungod kay nagtuo kining nangayo sila og hinabang gikan sa kagamhanan sa siyudad.

Gibutyag ni Velarde nga namatay ang ilang inahan niadtong  Agusto 29, 2013 ug ang mayor uban sa iyang mga sakop miadto sa ilang dapit aron pagsusi sa puso  artesiano  nga  naguba  sa ilang duol.

Apan mihapit kini  sa ilang balay ug mitunol og P200 nga kwarta ug misil-ing  sa haya ug dayon nagpakuha kini og hulagway ug ang maong hulagway giingong gilakip sa pagbutang sa magazine sa 100 days nga accomplishment niini. Ang maong hulagway  gi-post  sa social media (FB) ug nakita sa iyang igsuon  didto  sa gawas. Mibahad si  Velarde nga  ikonsulta  niya kini sa kaila  niyang abogado sa bahin sa lakang nga ilang himuon.

Sa iyang bahin, si De los Reyes nga nahinabi sa mga tigbalita  nagkanayon nga ang maong haya diin siya nagpahulagway didto kini sa barangay Lagtang ug ang namatay kauban nila nga Adventist nga nakabenepisyo sa programa sa siyudad nga libreng lungon, haya ug pagpalubong sa mga kabus nga mamatay.

Gipasabot ni De los Reyes nga siya gani mismo nakugang usab kay nindot ang lungon  apan giingong mao gyud kadto nga klase sa lungon ang nagkantidad og P5,000.

Ang siyudad mohatag  og P5,000 nga budget alang sa lungon sa mamatay nga kabus.

Ang nahinumdoman sa mayor   mao ang apilyedo lang sa namatay nga “Bacus” ug miadto siya didto  kay  gipapamulong  siya  sa haya. (BANAT NEWS)