CEBU, Philippines - Giayo’g sukit-sukit sa mga konsehal ang mga opisyal sa lainlaing departamento sa Cebu City Hall mahitungod sa dagku kaayo nga kantidad nga buot nila ipasukip sa Annual Budget 2014 alang sa Training ug Transportation.
Si Konsehal Margarita “Margot†Osmeña, pangulo sa budget and finance committee sa Cebu City Council, miingon nga nakasumada na sila og kapin sa P14 milyones sa pipila lang ka department alang ra sa training.
Nahibulong si Osmeña kay samtang ang matag departamento nagpagahin og budget alang sa training sa ilang mga kawani, ang Human Resource Development Office nga maoy personnel division, aduna ‘say training budget nga gipangayo.
Matud ni Osmeña nga kun isumada pag-apil ang kantidad sa transportation sa mga departments daku na kaayo ang maong kantidad nga nagahin.
Ang mga konsehal miingon nga bisan gani sila sa konseho nagdaginot pinaagi sa pagminus sa ilang mga biyahe.
Si Konsehal Alvin Dizon miingon nga kun dunay mga kawani nga pasalmoton og training kinahanglang pahatagon sila og report kun unsay ilang nakat-onan sa ilang gitambongan.
Kini aron sa pagsiguro nga ang maong mga kawani wala mag-usik-usik sa gasto pagpadala kanila pagtambong sa training kay may nakat-onan man.
Unya sa Biyernes, ipadayon na usab ang budget hearing ug molungtad pa kini sa buwan sa Disyembre. – (FREEMAN)