CEBU, Philippines - Patay ang usa ka lalaki nga gipusil sa wala pa hiilhing kriminal samtang mopalit pa unta kini og pagkaon didto sa Arellano Extension, Silangan II, barangay Tejero sa dakbayan sa Sugbo sa alas 5:30 sa miaging hapon.
Ang biktima naila nga si Renato Silva, 40, may live-in partner molupyo sa Arellano Extension.
Base sa spot report sa homicide section sa Cebu City Police Office nga ang biktima naglakaw padulong sa usa ka tindahan aron mopalit og pagkaon.
Matud pa nga nagbarog ang wala pa mailhing suspetsado duol sa giagian sa biktima ug pagkataud-taod mibunot kini sa wala pa matino nga kalibre sa armas ug gipusil ang biktima.
Naigo ang biktima sa walang aping ug sa iyang dughan nga maoy hinungdan sa iyang hinanaling kamatayon.
Pag-abot sa mga sakop sa homicide section ila na lang napalgan nga nagbuy-od na ang patay nga lawas sa biktima sa kilid sa dalan nga naligo sa iyang kaugalingon nga dugo.
Padayon pang gipanid-an sa kapolisan ang killer. (BANAT NEWS)