CEBU, Philippines - Nagtingkagol sa Talisay City Police Station detention cell ang usa ka suspetsadong tulisan human kini masikop sa gipahigayong hot pursuit operation sa mga polis kagahapon sa kadlawon. Ang suspetsadong nasikop mao si Ebenizer Repulledo, 35, taga sitio Pang-pang, barangay San Isidro, dakbayan sa Talisay. Padayon pang gipangita ang giingong kauban ni Repulledo nga si Rodrigo Raganas alyas “R-R.†Ang biktima sa duha mao si Rosmann Cabo, 19, taga sitio Dawis barangay San Roque, Talisay kinsa gitulis samtang nagpadung na pauli sa ilaha ug gikuhaan sa iyang pitaka nga dunay sulod nga P1,500 ug usa ka Seiko watch nga nagkantidad og P6,000.
Ang mga tulisan daling mibiya apan sa gihimong followup operation nila ni SPO1 Mikie Espina, SPO1 Yvonne Illustrisimo ug PO2 Edwin Campomanes daling miresponde sa maong hitabo.
Matud ni Espina nga ang motorsiklo nga gisakyan sa mga suspetsado gibiyaan diha sa karsada sa sitio Dawis habig na sa barangay Tabunok ug dihang gisusi nakit-an sa U-Box ang lisensya ni Repulledo maong ilaha kining natultolan.
Si Repulledo mitug-an sa mga polis nga si Raganas maoy iyang kauban sa maong krimen apan wala kini maabti ngadto sa mga polis sa ilang balay.
Si Repulledo ug Raganas gikatakdang pasakaan og kasong robbery kagahapon diha sa piskaliya sa dakbayan sa Talisay. (BANAT NEWS)