CEBU, Philippines - Nasikop ang number 1 most wanted person sa lalawigan sa Sugbo sa mga sakop sa Criminal and Investigation Detection Group (CIDG) 7 ug sa kapolisan sa dakbayan sa Davao nga nagtagotago sulod sa 16 ka tuig sa Freedom Village, barangay San Antonio, Agdao Davao City niadtong Biyernes sa udto. Ang nasikop naila nga si Crispin Cañada Guba, 40, molupyo sa Freedom Village, barangay San Antonio, Agdao Davao City.
Matud pa ni Supt. Fermin Fernandez nga nahinabi sa mga tigbalita nga ang suspetsado nalambigit sa usa ka krimen 16 na ka tuig ang milabay.
Sumala pa ni Fermin nga ang biktima kuyog sa iyang mga kauban nag-inom sa usa ka bar sa barangay Lawaan sa dakbayan sa Talisay.
Naglagot ang grupo ni Guba dihang miduol ang biktima niini nga si Bobby Nellas nga nanghuwam sa microphone.
Pipila ka minuto mibiya sa bar ang grupo ni Guba apan mibalik ra usab dayon ug usa ka saksi ang nakakita kang Guba nga maoy mipusil ni Nellas sa iyang dughan nga maoy hinungdan sa kamatayon niini.
Matud pa nga si Guba nagtago-tago sa pipila ka lugar lakip na sa Misamiz Occidental, Masbate, dakbayan sa Zamboanga ug sa Davao ug didto na kini nadakpan sa Davao. Kasamtangan nga nagtrabaho si Guba isip usa ka cashier sa usa ka gasoline station ug usahay isip usa ka car dealer. Apan dihang nahinabi sa mga tigbalita si Guba hugot niining gihimakak ang alegasyon nga siya ang nagpusil sa biktima.
Sumala pa ni Guba nga wala siya’y kalibotan kung kinsa ang nagpusil sa biktima. Matud ni Guba nga tinuod nga nag-inom sila sa maong bar ug nanglakaw sila apan nakahukom siya kuyog ang iyang mga kauban nga balikan ang maong tawo kay tabangan nila og kulata.
Sumala pa ni Guba nga pag-abot nila nagbuto-buto na ug midagan siya og apil, sa pagka-ugma na niana nakabalita na lang siya nga siya ang gitudlo nga maoy nipusil sa biktima maong misibat siya ug nagtago-tago.
Nasikop si Guba pinasikad sa Warrant of Arrest nga gi-isyu ni Presideing Judge Galican Arriesgado sa Branch 18 sa Regional Trial Court sa dakbayan sa Sugbo niadtong Oktubre 25, 2001.
Si Guba may patong sa iyang ulo nga P75 mil base sa Department of Interior and Local Government Memorandum Circular Number 2002-39. (BANAT NEWS)