Kinakusgan

Sa labing unang higayon, sulod sa kap-atan ug lima ka tuig, mihatag og pasidungog ang Zonta Club of Cebu I ngadto sa “top performing school” dinhi sa Dakbayan sa Sugbu ug sa unom niini ka batan-ong babayeng nakatapos sa ilang pagtuon diha sa Velez College. Gawas sa pagtamod og “outstanding record of academic achievements” nahimo sab ang unom nga Board Exam topnotchers.

Giila ang Velez College tungod sa makanunayon niining pagsigpaw og luna sa licensure examinations diha sa natad sa nursing ug physical/occupational therapy.

Sa ika-45 nga Founding Anniversary sa Zonta Club, ang mga Zontians pinangulohan ni Ms. Lucille Colina mitunol og Plaques of Recognition ngadto nilang Romelyn Icot, 6th placer; Nikki Natasha Javier, 7th placer; Kyzia Ann Kintanar ug Sheila Heruela, susamang 10th placers sa June 2013 Nursing Licensure Examinations o NLE; ingon man ngadto ni Levie Belleza (fifth placer sa PT exam). Si Beverly Anne Balagon nga maoy first placer unta sa June 2013 NLE pakyas sa pagtambong kay atua na kini sa kaulohan nagtikawtikaw diin nakapa’g na kinig trabaho. Ang “Top Young Women Professionals Award” kabahin sa gipanghingusgan sa pundok nga masangyaw ang kinakusgang “Success Stories” may kalabutan ang mga kababayen-an.

Gihangop sa lima ka batan-ong propesyonal ang maong pag-ila. Ang nakapatandog lang kay si Kyzia Kintanar lamang ang misugid nga wala pa una siya’y laraw nga molalin gawas sa nasud. Buot niyang mo-estar og taas-taas nga panahon sa Manila aron makatigom og igong kasinatian sa tambalanan nga dunay tinong area of specialization. “I feel the need to work in special hospitals to gain expertise in a specific area, in a heart institute for example, to be more focused,” padayag ni Kyzia.

Apan ang uban prangka kaayong miangkon nga out-of-the-country employment ang ilang paningkamotan nga makab-ot human makatigom og kasinatian dinhi sa ato. Bunga kini sa kamatuoran nga dako og gasto ang maong kurso, dili lalim ang maagiang pagsulay ug pagbansaybansay sa mga estudyante, ug ubos ra sab ang suholan sa mga nars dinhi sa nasud itandi sa halapad ug mabulokong kahigayonang naghuwat kanila sa laing nasud.

Si Romelyn Icot mipahayag nga Masters Degree in Nursing sa Cebu Normal University ang iyang sunod nga lakang. “If given the opportunity, it would be nice to be in Australia or England,” walay lipudlipod nga tubag ni Romelyn dihang gisukna kun mao ba sab ang iyang direksyon.

Si Levie Belleza tino na ang pagbiyahe ngadto sa Long Beach, California diin hagbay ra diay’ng nanimuyo ang iyang pamilya.

Nasayran nga ang Velez College niadtong 2002 hangtud 2005 nakadawat og Certificates of Recognition gikan sa Philippine Nursing Association ug Professional Regulations Commission isip usa sa mga “top performing nursing school” sa nasud.

Niadtong 2009, nakuha niini ang ika-lima nga pwesto isip top nursing school in the Philippines tungod sa passing rate niini nga 96 porsiyento. Duha, niadtong tuiga, ang nakahupot sa ika-lima ug ika-walo nga pwesto sa board exam (NLE). Sa mosunod nga tuig, ang Velez College nakaangkon sa ika-pito nga luna. Pagka-2011, ang mga topnotchers nahimutang sa ika-walo ug ika-siyam nga pwesto.

Sa nakalabay’ng tuig, mikulit kini og kinakusgang passing rate nga 99.4 porsyento aron maila isip ika-siyam sa top nursing schools sa Pilipinas; lima ka topnotchers ang misakgaw sa ika-unom, ika-walo, ika-siyam ug duha ka tinun-an sa ikanapulo nga luna.

Ning tuiga, ang Velez College midis-og ngadto sa ika-walong pwesto sa talaan sa top nursing schools ug may lima ka topnotchers. Wa na gyud papiri tungod kay gilangkat na gyud niini ang unang pwesto, gawas sa ika-unom, ika-pito, ug duha sa ikanapulong pwesto (whew!) diin nahilakip na ang mga pinasidunggan.

Lain pang highlight sa 45th nga kasumaran sa katukoran sa Zonta Club of Cebu I mao ang proklamasyon sa Cebu City Government ug sa Province of Cebu nga mimando sa pagtamod sa Nobiyembre 2013, ug tanang Nobiyembre sa mosunod nga katuigan, nga “Zonta Awareness Month.”

Matud pa ni Zontian Stella Bernabe, kanhi pangulo ug chairperson sa “Success Story” committee, “the core message of the bill is to inform the public about Zonta’s vision and mission to help the nation advance the education, health, economic, political, and social status of women from all walks of life worldwide.”