CEBU, Philippines - Usa ka babaye nga may deperensya sa pangisip ug usa ka lalaki, menor, ang nalandig sa tambalanan sa managlahing aksidente sa kadalanan sa lungsod sa Badian sa miaging adlaw.
Unang nalandig sa tambalanan ang wala pa mailhing babaye nga gihulagway nga may deperensya sa pangisip human kini nabanggaan sa motor sa barangay Malhiao sa lungsod sa Badian sa alas 2:25 sa hapon.
Ang maong babaye gihulagway nga may gitas-on nga lima ka tiil ug nagpangedaron na og 40-45 anyos.
Ang nakabangga kaniya mao si Ricardo Romanillos Acogido, 69, molupyo sa barangay Bugas sa lungsod sa Badian.
Base sa imbestigasyon sa kapolisan nga ang biktima naglakaw sa kilid sa dalan sa barangay Malhiao ug mikalit lang kini og labang sa karsada.
Ang suspetsado nga luwan sa iyang Honda nga motor nga may plate number PN 4773GE padulong unta sa barangay Manduyong sa lungsod sa Badian.
Wala makalikay ang suspetsado ug naigo niini ang biktima hinungdan nga natumba kini sa sementado nga dalan. Ang babaye gidala sa nirespondeng polis sa Badian District Hospital.
Samtang nalandig sab sa tambalanan ang usa ka 4-anyos nga batang lalaki human kini masaghiran sa motorsiklo human kini nabuhian sa iyang apohan nga milabang sa karsada.
Ang nakasaghid sa biktima naila nga si Jorge Apostol Aum, 35, molupyo sa barangay Malbago sa lungsod sa Badian.
Base sa imbestigasyon sa kapolisan nga ang biktima nagkuyog nga ninaog sa traysikol ug ang iyang apohan.
Gikuptan pa sa apohan ang maong bata apan nakabuhi kini ug milabang sa karsada hinungdan nga nasaghiran kini ni Aum.
Nalabay ang biktima ug natumba sa karsada ug nakaangkon kini og kadaot sa nagkadaiyang parte sa iyang lawas hinungdan nga dali kining gidala sa tambalanan.
Ang suspetsado mitahan sa iyang kaugalingon sa kapolisan sa lungsod sa Badian lakip na sa iyang gimaneho nga motorsiklo. (BANAT NEWS)