Cebu City Council OK sa tinguha ni Rama pagsagop og LGU sa Leyte

CEBU, Philippines - Ang konseho sa syudad sa Sugbo nga gidominar sa Bando Osmeña Pundok Kauswagan mopaluyo sa tinguha ni Mayor Michael Rama nga motabang og usa ka lungsod sa Leyte nga naapektohan pag-ayo sa bagyong Yolanda aron kini makabangon dayon.

Ang chairman sa Committee on Housing sa Cebu City Council nga si City Councilor Alvin Dizon nagkanayon nga ilang paluyohan ang maong lakang sa mayor sanglit usa  usab siya sa nakaduaw ug nakasaksi mismo sa kapait nga kasinatian sa mga residente sa Leyte nga grabing gikusokuso sa bagyo.

Sigon pa ni Dizon  nga buot usab niya nga daling makabangon ang taga Leyte gikan sa mapait nga kasinatian sa kabangis sa bagyong Yolanda. Si Dizon mitug-an ang iyang pagpaluyo ug sa mga kaubanan sa konseho maoy usa ka buhing pagpakita sa pagpakighiusa sa kagamhanan alang sa tiunay nga pagtabang sa mga biktima sa bagyo.

Gipasabot sa konsehal nga angayan lamang nga motabang ang syudad sa Sugbo sanglit dili man kaayo dako ug lapad ang kadaut nga nahimo sa bagyo dinhi sa Sugbo itandi didto sa Leyte ug Samar. Dugang pa niini nga ang pagpili sa local government unit nga tabangan sa dakbayan angayan tukion ug hisgutan tali sa executive ug legislatived department.

Nasayran nga si Rama gikatahong nikonsiderar sa lungsod sa Tanauan, Tacloban ug Ormoc nga maoy tabangan sa syudad.

Ang mayor nagkanayon dili kinahanglan nga mogasto og dako nga kwarta ang siyudad sanglit adunay mga pribadong korporasyon ang motabang diin ang city government maoy mamahimong instrumento.

Kini subay sa iyang gipatuman nga public private partnership sa daghang mga proyekto sa siyudad nga wala na moagi sa city council. (BANAT NEWS)