CEBU, Philippines - Dugang kaso ang atubangon sa pamilyang Yapha sa lungsod sa Pinamungajan nunot sa giingong wala pagpang-uli sa mga armas nga gipanag-iya sa gobyerno.
Ang barangay secretary sa Pandacan nga si Jose Gilson Fedrequilan ang nipasaka na usab og reklamo sa buhatan sa Ombudsman batok kang Konsehal Jeffrey Anthony Yapha.
Si Yapha giingong giisyohan og 9mm Tanfoglio cal. Pistol balor og P24,750.00 niadtong Hulyo 22, 2010 panahon sa iyang iyaan nga si Geraldine Yapha isip mayor.
Niadtong 2012, ang munisipyo gipahibawo sa Firearms and Explosive Office, Firearms, Licensing Division, sa Kampo Krame expire na ang lisensiya sa maong armas ug kung dili ma-renew, kanselahon ang lisensiya ug imbargohon ang maong armas.
Sa dihang nilingkod ang bag-ong mayor nga si Glenn Baricuatro, nimando kini sa pagpauli sa tanang butang sama sa sakyanan ug mga armas sa niaging administrasyon.
Si Fedrequilan nipasangil nga bisan sa mga mando, si Yapha nagdumili kini sa pag-uli sa maong armas.
Matud pa ni Fedrequilan nga kalapasan sa balaud ang gihimo ni Yapha sa pagtago sa maong butang sa gobiyerno.
Sa niaging buwan, ang amahan ni Yapha nga si kanhi mayor ug outgoing president sa Association of Barangay Councils, Jeffrey Yapha, ang gipasakaan usab sa susamang reklamo.
Si Rigel Teñedo nipasangil nga daghang armas ang wala giuli sa kanhi mayor sama sa 12 GA Norin shotgun, 9mm Glock 19 handgun, 9mm P19 Tanfoglio pistol, 45 Imp. Def. Ranger pistol, 9mm Bernardelli Sarselmag pistol, 9mm Glock JZ pistol, ug 9mm Llama pistol.
Si Jeffrey giingong nitugyan sa maong mga armas sa buhatan sa kapolisan sa ilang lungsod.
Apan ang kanhi hepe nga si S/Insp. Jaime Dela Fuente Santillan mihimakak nga may mga armas sila nga nadawat gikan kang Yapha. (BANAT NEWS)