France magtukod og ‘disaster proof’ housing
CEBU, Philippines - Ang gobiyerno sa France, pinaagi sa ilang relief operations team nga ipadala sa Pilipinas magtukod og mga "disaster-proof" nga mga balay alang sa mga biktima sa bagyong Yolanda.
Si French Ambassador Gilles Garachon sa gipahigayon nga press conference sa miaging adlaw nagkanayon nga duna sila’y team sa mga architects ug engineers nga manganhi sa Sugbo, sa ikaduhang hugna sa ilang relief operations dinhi sa Sugbo.
Gawas sa pagtukod og kabalayan, tudloan sad nila ang katawhan kun unsaon paghimo sa maong mas lig-on nga mga balay.
Apan sa pagkakaron, naa pa sila sa first phase sa ilang relief operations diin daghan silang ipanghatag nga pagkaon, tubig mainom ug uban pa nga mao gyud ang immediate nga gikinahanglan karon sa mga biktima sa bagyo.
Aduna nay 60 ka mga French military ug medical personnel nga nangabot dinhi sa Sugbo aron motabang sa uban pang dapit nga naigo sa bagyo.
Buot ni Ambassador Garachon nga mahibaw-an sa mga Filipino nga ang Pransya andam sa pagtabang kanunay panahon sa kalisdanan. (BANAT NEWS)
- Latest
