Babaye ug lalaki ang gidauban

CEBU, Philippines - Iya sa babaye ug lalaki ang lawas nga napaig nga napalgan sulod sa usa ka SUV sa dakbayan sa Danao sa miaging adlaw base sa resulta sa eksaminasyon sa crime laboratory.

Si Dr. Nestor Sator, medico legal officer miingon nga ang napaig nga patay nga lawas  iya sa babaye ug lalaki.

Sumala pa nga nasuta nga lalaki ang usa sa patay nga lawas tungod kay wala man makompleto og kasunog ang kinatawo niini ug dako ang bukog sa iyang pelvic region.

Samtang ang babaye nailhan usab ni Dr. Sator tungod sa bukog sa pelvic area nga mas gamay ug matud pa nga dunay “pasta” ang ngipon sa maong babaye.

Matud pa ni Satur nga tungod sa dental record sa maong babaye dali ra nilang nailhan ang pangalan niini.

Apan miingon si Sator nga dili pa mailhan kun unsa ang hinungdan sa kamatayon sa mga biktima tungod sa kagrabe sa pagkapaig sa mga biktima.

Matud pa ni Satur nga ila sab nga gikuhaan og sample ang sinina sa duha.

 Matud ni Sator nga gipatay nang daan ang mga biktima usa gisakay sa sakyanan ug gidaoban sa sulod niini.

Gisumiter na sumala pa ni Sator ang resulta sa macro-etching sa Provincial Intelligence Branch (PIB) sa Cebu Provincial Police Office (CPPO). 

Lakip na niini ang resulta sa body number, chassis number ug engine number sa sakyanan.

Matud pa ni Supt. Rodolfo Albotra miingon nga ang maong sakyanan narehistro sa Mindanao ug nabaligya dinhi sa Sugbo.

Sumala pa ni Albotra nga duna na sila’y kasayoran sa dealer sa maong SUV nga matud pa usa ka Korean national.  (BANAT NEWS)