CEBU, Philippines - Nakig-alayon na ang kapolisan sa lalawigan sa Sugbo sa Land Transportation Office ug sa Regional Crime Laboratory aron sa pag-ila sa tag-iya sa sakyanan ug sa duha ka patay nga lawas sa tawo sud sa gidauban nga sports utility vehicle sa barangay Sabang sa dakbayan sa Danao sa miaging adlaw.
Ang Provincial Director sa Cebu Provincial Police Office Sr. Supt. Noel Gillamac miingon nga gisubay nila sa LTO ang engine number sa sakyanan nga usa ka Hyundai Santa Fe apan wala gyud kini record sa LTO.
Matud pa ni Gillamac nga kun mahibaw-an na nila kun kinsa ang tag-iya sa maong sakyanan ug kinsa ang duha ka tawo nga nasunog anha na makasugod sa ilang subsob nga imbestigasyon.
Lakip ang Highway Patrol Group ingon man ang Provincial Intelligence Detection and Management Branch ang motabang sa imbestigasyon.
Si Gillamac miingon nga base sa imbestigasyon sa Crime Scene Investigation gipatay nang daan ang duha ka mga tawo tungod kay dunay duha ka mga ligid nga gibutang sa ilang dughan.
Matud pa ni Gillamac nga usa ka maayong pagkaplano ang maong krimen tungod kay ang nahimutangan sa nasunog nga awto 2.5 kilometros ang gilay-on gikan sa National Road. Apan ang hepe sa Regional Intelligence Division sa Police Regional Office-7 Supt. Paul Labra miingon nga nagpadala na siya og duha ka mga investigators aron makatabang sa imbestigasyon sa maong kaso.
Matud pa ni Labra nga tulo ka anggulo ang gisubay sa maong kaso, lakip na niini ang drugas, love triangle ug ang posibleng kalambigitan sa mga langyaw sa maong krimen.
“Sa akong initial nga investigation posible nga drugas, love triangle, possibility of involvement sa mga Koreans,†sumala pa ni Labra tungod kay Korean nga sakyanan ang gisunog ug posible nga mga Koreano usab ang mga namatay.
“Ang sakyanan is a Korean car, wala’y plate number so daghang anggulo ang masulod sa huna-huna sa imbistigador,†dugang ni Labra. Matud ni Labra nga sa iyang pagpakisusi sa mga imbestigador wa pa hinuon siya’y nadawat nga taho nga dunay na-report nga missing nga mga tawo labi na sa mga Korean National. (BANAT NEWS)