CEBU, Philippines - Misaka na og P1 ngadto sa P1.50 kada kilo ang presyo sa commercial rice tungod sa taas nga demand niini apan ang presyo sa NFA rice nagpabilin nga P27 kada kilo.
Matud pa ni Lucy Rosales, ang spokesperson sa National Food Authority-7 nga walay kakulang sa suplay sa commercial rice ug NFA rice. Matud pa ni Rosales nga ang mga premium rice sama sa Ganador natural nga musaka kini kay naghinangat na ang Pasko diin ang katawhan mas ganahan mukaon og mas lami ug humot nga bugas. Ang premium rice nisaka og piso kada kilo samtang nisaka usab ang presyo sa mga well-milled rice og P1 ngadto sa P1.50 kada kilo.
Ang espekulasyon nga nimahal ang premium rice tungod sa kalamidad nga miigo sa Kabisay-an.
Matud pa ni Rosales nga aduna pay 400,000 ka sakong commercial rice ug 580,000 NFA rice nga naimbentaryo sa unang semana sa Nobiyembre. Apan matud pa ni Rosales nga nakuhaan na ang commercial rice tungod kay grabe ang pinalitay sa katawhan sa maong bugas aron ipanghatag isip relief goods.
Matud pa ni Rosales nga sukad Nobiyembre 11, nakapagawas na sila og 52,000 ka sakong NFA rice ngadto sa Department of Social Welfare and Development-7, Philippine National Red Cross, National Disaster Risk, Reduction and Management Council, charitable institutions, local government units ug mga pribadong indibidwal.
Gi-awhag usab ni Rosales ang mga grain retailers nga dili magpahimulos sa higayon pina-agi sa pagpatuyang sa pagsaka sa ilang presyo sa bugas. (BANAT NEWS)