Karsada sa Basilica del Santo Niño di paagia’g sakyanan

CEBU, Philippines - Dili na paagian og mga sakyanan ang karsada  sa duol  sa  Basilica del Santo Niño  sa Osmeña Boulevard  ning  dakbayan  sa Sugbo.

Si Vice Mayor Edgardo Labella miduso og usa ka ordinansahon nga magdeklarar na sa maong bahin sa Osmeña Boulevard nga para na lang agian sa mga tawo. Ang usa sa rason nga gisugyot ni Labella nga dili na paagian og sakyanan ang maong karsada kay gituohan nga ang kanunay’ng pagkurog sa kampanaryo tungod sa wala’y puas nga pag-agi sa mga sakyanan maoy nakapahuyang sa semento.

Ang kampanaryo sa 452 ka tuig na nga simbahan nahugno dihang nasinati sa Sugbo ang 7.2 magnitude nga linog kaniadtong Oktubre 15 ug gani hangtud karon wala pa ayoha pagbalik ang  maong kampanaryo sa simbahan.

Ang pagsirado sa maong karsada sigurado nga makaapekto sa pag-agi sa mga sakyanan gikan sa Plaza Independencia paingon sa dalan Colon.

Kini maoy rason nga ang kasikbit nga karsada – sa  Legaspi Street – maoy gihugopan karon sa mga sakyanan nga mopaingon sa Colon ug kanunay ra nga makasinati og traffic jam.

Ang Legaspi Street lapad-lapad unta nga karsada nga makaagi ang daghang sakyanan apan ang kabahin niini atubangan sa Barangay Hall sa Santo Niño gihimong parking area sa mga sakyanan sa barangay.

Gawas sa illegal parking, ang mga tindahan  misuyla na ngadto sa karsada ug nakatampo sa kahuot sa mga sakyanan nga moagi sa maong dapit.

Ang gisugyot nga ordinansahon ni Labella tukion  sa mga konsehal sa umaabot nga mga sesyon ug kadtong mga apektado makahimo sa pagsumiter sa ilang sentimento atol sa itakda unya nga public hearing. (BANAT NEWS)