Fluvial procession sa birhen sa regla ugma

CEBU, Philippines - Andam na ang pagpahigayon sa tinuig nga fluvial procession sa imahen sa Birhen sa Regla karong umaabot Nobiyembre 16 o ugmang adlawa. Matud pa ni Lapulapu City Tourism Officer Hembler Mendoza ang maong kalihukan niadto pa untang Nov. 12 gihimo atol sa unang adlaw sa nobenaryo nunot sa siyam ka adlaw sa dili pa ang kapistahan niini, apan wala kini mahinayon gumikan sa hulga sa bagyong "Zoraida" nga moigo sa nasud.

Ang Coast Guard wala mohatag og pagtugot sa mga organizers nga mopahigayon og fluvial procession sa milabay’ng Martes ug gisibog kini ugmang adlawa.

Ang rota sa maong procession manukad sa simbahan sa Marigondon alas 6:00 sa buntag human sa Santos nga Misa ug imotorkada kini ngadto sa Pacific Grand Villa Resort sa Brgy. Subabasbas ug magsubay sa kadagatan sa Marigondon, Agus, Maribago, Mactan, Punta Engaño ngadto na sa Muelle Osmeña Wharf diin sugaton kini sa mga opisyal sa dakbayan sa Lapulapu pinangulohan ni Mayor Paz Radaza.  (BANAT NEWS)