Nakalas sa CV niabot na og 72

CEBU, Philippines - Naabot na og 72 ka mga tawo ang nakalas ug 345 ang angol ug lima ang missing sa rehiyon matud pa sa talaan sa Office of Civil Defense 7.

Matud pa sa OCD nga 17 sa mga nakalas gikan sa lungsod sa Bantayan, 15 sa San Remegio ug 11 sa dakbayan sa Bogo, 9 sa Daanbantayan, 3 sa San Francisco, Sta. Fe, Medellin ug Madridejos.

Samtang tag duha sa lungsod Sogod, Pilar, ug tag usa sa Balamban, Tabogon, dakbayan sa Lapu-lapu ug laing usa ang nakalas sa Guindulman sa Bohol.

Kapin na sa tunga sa milyon ang mga tawo nga naapektohan sa maong bagyo sa tibook rehiyon ug kapin sa usa ka gatos ka libo ka mga pamilya ang apektado.

Samtang nagusbat sab ang mga balay sa 65, 728 ka mga pamilya.  Wala pa gihapon mabalik ang kuryente sa pipila ka mga lungsod nga sakop sa ika-upat ug ika-unom nga distrito sa lalawigan sa Sugbo.

Hinuon nabalik na ang kuryente sa Siquijor ug sa Negros Oriental gawas sa dakbayan sa Guihulngan ug dakbayan sa Canlaon. (BANAT NEWS)