CEBU, Philippines - Usa ka gipasanginlang kawatan ang gipusil patay niadtong Martes sa gabii diha sa sitio Hollow block, barangay Lagtang, dakbayan sa Talisay.
Ang biktima mao si Boyet Menguito, taga sitio Salvador barangay Tanke sa nahisgutang siyudad nakaangkon og mga samad pinusilan sa wala ug tuong dughan ug usa sa ulo habig sa tuong kilay ug tuong bukton wala na makaabot nga buhi ngadto sa Talisay City District Hospital. Sila si PO3 Rey Bucao, PO3 Benedicto Lasque, PO3 Ferdinand Pablo ug PO3 Junard Chiong ang daling miresponde sa maong insidente.
Ang mga estambay diha sa lugar mibutyag ngadto sa mga polis nga nakadungog sila og buto-buto sa armas hinungdan nga ilaha kining gisusi ug mao na lay ilang nakita ang usa ka tawong nagbuy-od na diha sa ngiob nga lugar nga naligo sa kaugalingong dugo.
Sa imbestigasyon sa kapolisan giingong si Menguito ubos kini sa probation sa kasong theft ug giingong nalambigit usab kini sa mga insidente sa pagpanglungkab diha sa ilang lugar. Ang kapolisan nagpahigayon og follow-up nga imbestigasyon sa motibo sa pagpusil patay kang Menguito.
Na-recover sa mga polis gikan sa lugar nga nahitaboan ang duha ka kabhang sa mga bala sa kalibre .45 nga pistola. (BANAT NEWS)