NFA mipasalig sa kaabunda sa ilang bugas

CEBU, Philippines - Gipasalig sa buhatan sa National Food Authority (NFA) 7 nga wala  magnihit   ang bugas   sa Kabisay-an human  kini  makasinati sa 7.2 magnitude nga linog ug  sa bagyong  Yolanda.

Si NFA 7 Spokesperson Lucy  Rosales nga nahinabi sa Banat News miingon nga bisan  nagusbat  ang  kahumayan  sa Bohol  human  sa linog  ug giusban  sa bagyong   Yolanda, ang  kinakusgang  bagyo  sukad  mahimugso  ang kalibotan, wala  katarug  ang  mga  tawo  nga  gutom  sa kadaghang  pundo  sa bugas  sa mga  bodega  sa NFA.

Gitataw niya nga ang  maong  mga  bodega  atua  sa dakbayan  sa Bogo  ug  lungsod  sa Daanbantayan  sa amihanang  Sugbo  ug  sa  lungsod  sa Camotes.

Dugang pa niya nga bisan sa dakong kadaut sa  mga  kabalayan  ug  mga  dagkong  edipisyo  sa goberno  ug  pribadong sector apan ang  mga bodega sa NFA sa maong mga dapit, igo lang nakasinati og gamay nga kadaut, sama  sa   nahagba   nga  koral ug uban pa.

Si Rosales miingon nga nagtinguha usab unta   sila  sa pagpadala og sinakong bugas  ngadto sa Region 8 nga naglakip sa Maasin, Leyte ug Tacloban apan nabalaka  sila sa  kaisug  sa mga  tawo   nga  midangop  sa pagpangawat.

Busa  miingon  si Rosales  ang gihimo  sa  ilang  buhatan  karon mao na lang  ang  pagmonitor sa presyo  sa bugas  sa merkado aron  dili  pahimuslan  sa  mga negosyante ang  kakusog  sa halin  niining  maong  palaliton  karong  panahona.

Si Rosales mipasabot nga bisan kun  ting-ani  sa humay  karong  panahona, apan  mosaka  sa gihapon  ang  presyo  niini kun  dili  kabantayan  ang  mga  mapahimuslanong mga  negosyante  og  bugas. (BANAT NEWS)