CEBU, Philippines - Ang mga lisensyado nga tiggama og mga pabuto sa syudad sa Lapu-lapu mireklamo tungod sa nagkadaghan nga pabrika nga way lisensya ilabi na sa barangay Babag sa maong dakbayan.
Kini tungod kay dyutay na lang ang mamalit sa maong produkto ug apektado na ang ilang negosyo.
Sumala ni Lourdes Pungasi, pangulo sa mga asosasyon sa legal nga Firecrackers’ Manufacturer sa Lapu-lapu city nga naalkansi na sila sa ilang negosyo tungod sa pagsulbong sa daghang pabrika sa pabuto apan wala magbayad og buhis sa kagamhanan.
Matud pa ni Pungasi nga dako kaayo ang ilang gigasto sa paglukat og permit gikan sa local government units, Firearms and Explosives, Security Service and Agency and Guards Supervisory Section didto sa Campo Crame.
Iyang gihulagway nga delikado ang mga produkto sa illegal nga mga tiggama og pabuto kay wala kini magsubay sa tukmang panukdanan.
Iyang gitataw nga iya na nga gisang-at ang maong reklamo ngadto sa mga otoridad.
Sa pagkakaron gipaabot pa ni Pungasi ang tukmang aksyon gikan sa kagamhanan. (BANAT NEWS)