CEBU, Philippines - Mikabat sa 90 porsiyento ang danyos sa mga kabalayan ug agrikultura ang nahiaguman sa mga residente sa tulo ka mga lungsod sa Bantayan islands.
Matud pa ni Bantayan Mayor Ian Chris Escario , nga sa 27 ka barangay sa mainland Bantayan ug sa mga gagmay’ng isla niini, mikabat sa himabaw sa tanang puluy-anan, kahayopan ug mga tanom ang nagusbat .
Gumikan sa bagyong Yolanda mikabat sa 116,964 ka pamilya ang apektado diin 17,504 ka balay ang hingpit nga nagusbat sa lungsod sa Bantayan. Samtang ang mga isla sa Loong, Lipayran, Luyong Baybay, Butiguis ug Hilutungan, namatyan sa 15 ka tawo ug 15 usab ang missing.
Gikinahanglan sa katawhan didto mao ang tambal, pagkaon, tubig ug mga ginamit nga tarpoline .
Samtang sa Lungsod sa Sta. Fe mokabat sa P1.248 bilyones ang kantidad sa danyos nga nahiaguman sa maong lungsod.
Matud pa ni Sta. Fe Mayor Jose Esgana ang danyos gibase sa mga kadaut sa mga panimalay sa iyang dapit, mga school buildings, communication lines, infrastructures, agriculture ug sa negosyo sa maong dapit.
Sa maong trahedya tulo ka tawo ang nakalas ug usa ang missing hangtud ning pagbalita didto sa maong lungsod.
Ang turismo sa lungsod sa Sta. Fe maoy apektado kaayo sa bagyong Yolanda gumikan kay 95 porsiyento sa mga beach resorts sa maong dapit ang naguba. Miingon si Esgana nga dili kini daling mahibalik sa ilang normal nga kahimtang.
Nanghinaut ang duha ka mayor sa Sta. Fe ug Bantayan nga mahatagan og dinaliang pagtagad ang ilang mga gikinahanglan ilabi na sa pagbangon sa maong lungsod gikan sa hilabihang kadaot. (BANAT NEWS)