CEBU, Philippines - Usa ka tensyon ang nahitabo tali sa mga sakop sa Bureau of Fire Protection 7 ug sa mga sakop sa Prevention Rehabilitation, Order and Beautification Enhancement (PROBE) sa buhatan sa BFP 7 sa dalan N. Bacalso sa miaging gabii.
Ang mga sakop sa BFP7 gipangulohan mismo ni Regional Director Supt. Ma. Luisa Hadjula, samtang gipangulohan usab ni Racquel Arce ang head sa PROBE.
Sumala pa sa mga saksi nga nagsugod ang maong tensyon human misaka si Hadjula sa ikaduhang andana aron makigsabot nga magtunga ang CCMC ug ang BFP sa upat ka lawak sa taas.
Gipasaka matud pa ni Hadjula ang mga double deck ug mga mattress ngadto sa maong building nga gamiton unta sa mga sakop sa Search and Rescue Unit sa BFP tungod kay full red alert ang maong ahensya. Tungod niadto mipakanaog og kamandoan si Mayor Michael Rama nga ipatangtang ang maong mga double deck ug ipahatod sa Cebu City Sports Complex.
Miabot ang mga sakop sa PROBE sa BFP building aron sa pagkuha unta sa maong mga double deck ug mga mattress apan gipugngan sila sa mga sakop ni Regional Director Hadjula. Nag-inilogay sa mga mattress ang mga sakop sa PROBE ug sa BFP sa taas sa BFP building. Dali usab nga miabot sa building sa BFP ang mga firetruck nga mibabag sa entrance sa maong buhatan nga nag-ali sa usa ka dump truck nga nagkarga sa mga mattress nga gikuha gikan sa sulod.
Dali usab nga nagbarikada ang mga bombero sa atubangan gyud mismo sa dumptruck nga didto sa ganghaan sa BFP building. Hangtod sa pagsulat ning balita wala pa ma-irog ang mga sakyanan nga nag-ali sa building. Bisan pa man sa nahitabong tensyon padayon gihapon ang CCMC sa pagdawat og mga pasyente ug pagtambal niini sa ubos sa BFP building.
Gisuwayan unta sa pagkuha og habig ang BFP sa mga tigbalita apan si Hadjula mibalibad niini.
Si Arce miingon sa mga tigbalita nga dili siya mopahawa kun dili siya sugoon sa mayor. (/WC)(BANAT NEWS)