Mga bombero mitabang sa paghakot sa mga pasyente sa CCMC- Dir.Hadjula
CEBU, Philippines - Giklaro sa regional director sa Bureau of Fire Protection -7 nga si Sr. Supt. Ma. Luisa Hadjula ang pagtuo sa publiko base sa nanggawas nga balita nga susama silang nahimong dautan kabahin sa isyu sa pagpapahawa kanila diha sa ilang buhatan aron gamitong temporaryong kabutangan sa mga pasyente sa Cebu City Medical Center.
Si Hadjula mitug-an sa programang “Dial Your Opinion†ni Prof. Nestor Ramirez sa DyRC Radyo Calungsod , ang tanan nilang mga bombero mitabang sa paghakot sa mga pasyente sa CCMC atol sa pagkahitabo sa linog niadtong Oktubre 15.
Sumala pa niya wala sila magmagahi ug misugot sila dayon nga gamiton ang BFP Building aron temporaryong kabutangan sa mga pasyente.
Matud pang Hadjula nga ang wala nila ikahimuot ug gikasakit sa buot sa moral sa kabomberohan mao ang pamahayag ni Dr. Gloria Duterte , director sa CCMC kay giingong mibuhi kini og pamahayag nga mas nagkinahanglan sila sa mga lawak sa BFP itandi sa mga bombero nga duna ray trabaho kung dunay sunog.
Matud ni Hadjula, wala kinahanglana ni Duterte nga mobuhi og ingon niadto nga matang sa pamahayag tungod kay wala kini kamatuoran ug dili kini tinuod.
Giklaro ni Hadjula nga 24/7 ang trabaho sa kabomberohan ug apil na gani niini ang pagsugal sa ilang kinabuhi kung gikinahanglan aron masigurong luwas ang mga kinabuhi, propiyedad sa Cebu ug sa tibuok Central Visayas.
Apan bisan pa man sa pagtamay nga ilang nadawat, gidasig gihapon ni Hadjula ang iyang mga sakop nga dili na lang kini igsapayan ug motrabaho gihapon sila kutob sa ilang mahimo bisan ikamatay pa nila.
Giesplikar ni Hadjula nga kung ang mayor dunay kaakohan sa iyang kapin usa ka milyon nga mga konstituwente dinhi sa Cebu City, siya isip regional director sa BFP sa tibuok Central Visayas, aduna sab siya’y kaakohan sa dul-an unom ka milyon ka mga konstituwente nga iyang kinahanglang panalipdan gikan sa mga sunog ug katalagman. (BANAT NEWS)
- Latest
