CEBU, Philippines - Gipasakaan og kaso sa Ombudsman ang kanhi barangay captain sa Duljo Fatima og usa ka pribadong tawo human gipasanginlang nagkunsabo sa pagbaligya sa mga construction materials sa barangay.
Matud ni graft investigation and prosecution officer Carla Narvios-Tanco nga sila si Miguel Cabatino ug Gerardo Ilustrisimo maoy gipasakaan og kaso tungod sa nawala nga mga construction materials nga mobalor og P101,240.26.
Ang duha mag-atubang og kasong malversation of public properly ug girekomendar nga mopiyansa og P40 mil alang sa temporaryo nilang kagawasan samtang husayon pa ang kaso diha sa korte.
Usa ka Elmer Abella ug mga kaubanan niini ang misang-at og kaso batok sa duha, ang pagpangawat nahitabo niadtong 2004. Sumala pa nga dunay gihatag nga mga construction materials ang Cebu City niadtong tungora alang sa Self Help Project sa maong barangay.
Apan giingong gibaligya kini ni Ilustrisimo. Ang kanhi opisyal hugtanong mihimakak sa mga alegasyon batok kaniya.
Matud niya nga ang maong materyales giapod-apod kini sa mga sitio nga maoy mga benepisyaryo sa programa. Apan si Tanco wala makombinsir sa pangangkon ni Ilustrisimo tungod sa kalig-on sa mga ebidensyang gisumitir sa mga reklamante. (BANAT NEWS)