CEBU, Philippines - Subsob na ang pangandam sa Office of Civil Defense 7 (OCD7) ug Police Regional Office 7 (PRO7) sa umaabot nga bagyong Yolanda. Ang Regional Director sa Police Regional Office 7 Chief Supt. Danilo Constantino miingon nga iisa niya sa full alert ang tibook Central Visayas kun mo-landfall na ang bagyo.
Si Constantino miingon nga gipatawag na niya ang mga personnel sa PRO7 nga naka-agi na og training sa Search and Rescue Operations ug iya na usab nga gimandoan kini nga kanunay nga andam.
Sumala pa ni Constantino nga mopatawag siya og tigum sa Regional Disaster Risk Reduction and Management Council sa alas 10:00 karong adlawa aron maplanohan na nila ang pagpangandam nga ilang buhaton.
Samtang ang Admin Officer sa Office of Civil Defense nga si Flor Gaviola subli nga nanawagan sa katawhan nga dili na maghuwat pa nga ingnon sila nga mobakwit ilabi na niadtong nagpuyo sa mga disaster prone areas.
Miingon si Gaviola nga sa Bohol adunay 23 ka mga lungsod nga flood prone area samtang sa Negros Oriental adunay tulo ka mga dakbayan ug 11 ka mga lungsod ang gitataw nga bahaonon.
Sukwahi kini sa Sugbo nga tulo ka dakbayan lang ug 8 ka mga lungsod lang ang flood prone areas samtang usa lang ka lungsod sa Siquijor ang flood prone area.
Gihangyo usab ni Gaviola ang mga residente nga anaa magpuyo duol sa mga sapa sa paghinay na og bakwit tungod kay posibling mokalit lang og saka ang tubig niini.
Ang maong mga sapa naglakip sa Kotkot sa dakbayan sa Sugbo, Mananga sa dakbayan sa Talisay, Guinabasan sa lungsod sa Asturias, Balamban ug sa Sapangdaku.
Gihangyo usab ni Gaviola ang mga tawo nga nagpuyo sa bukid sa pagbantay kanunay labi na sa posibling pagdahili sa yuta. (BANAT NEWS)