CEBU, Philippines - Mikabat sa trese ka mga tawo ang naangol ug 32 ka panimalay ang nangaguba sa alimpus nga miigo sa nagkalainlaing dapit sa Metro Cebu areas dala sa bagyong Wilma sa miaging Lunes sa gabii.
Sa dakbayan sa Lapulapu, may upat ka balay ang naguba didto sa Brgy. Mactan, duha sa Brgy. Punta Engaño, ug 10 sa Brgy. Tingo, isla sa Olango .
Napulo usab ka balay ug usa ka stone craft factory sa lungsod sa Compostela ang nangaguba ug gipanglarot ang mga dagkong punoan sa kahoy nga mitugpa sa kabalayan.
Ang mga nawad-a’g balay sa maong lungsod mao sila si Gerry Villagracia, Joel Albenado ug Allan Morales.
Ang tag-iya sa stonecraft factory nga si Kenneth Ramirez ug Antonio Natad pulos nagtibi nga miasoy sa ilang nasaksihan nga hangin nga nagtuyok.
Hinuon milihok dayon ang mga opisyal sa kagamhanan sa maong lungsod paghatag og hinabang pagkaon sa mga nabiktima. Si Al Quiblat sa Philippine Atmospheric Geophysical and Astronomical Services Administration (PAGASA) nga nagbase sa Mactan, dakbayan sa Lapulapu maoy mipagawas og advisory sa mga molupyo bahin sa maong buhawi sa alas 6:00 pasado sa gabii niadtong Lunes.
Kasagaran sa maong mga balay natumba ug nawalis ang mga atop dihang gibuhosan kini sa uwan nga dala sa kusog ug nagtuyok nga hangin.
Si Dometila delos Santos nga taga Brgy. Tingo nagpasalamat nga luwas ang iyang pamilya ug walay kinabuhing nakalas sa maong trahedya.
Gawas sa natumba nga mga panimalay, may pito usab ka poste sa kuryente ang natumba ug usa ka kapilya ang naguba. Si Lapulapu City Mayor Paz Radaza nga personal nga mibisita ug miinspeksyon sa kahimtang sa mga residente sa Brgy. Tingo mipadayag nga motabang ang siyudad sa mga naapektahan.
Midugang siya nga gamiton usab ang heavy equipment sa siyudad alang sa clearing operation sa mga nagusbat nga dapit. Apan dili lamang mga gagmay’ng balay ang apektado sa maong buhawe kundi bisan ang mga hotel ug resort sa Lapulapu. Ang maong mga establisemento naglakip sa Shangrila Mactan, Movenpick Hotel ug BE Hotel sa Brgy. Punta Engaño, kansang mga gamit sama sa kurtina ug uban pang mga kahimanan sa resort nanglupad ug mitugpa didto sa mga swimming pool.
Samtang sa Brgy. Guinsay dakbayan sa Danao, unom usab ka panimalay ang naguba.
Matud pa ni PO3 Arnold Labine sa Danao Police Station, nga upat ka panimalay ang hingpit nga nagusbat , samtang duha ang igo lang mitakilid.
Ang mga tag-iya sa balay nga nagusbat mao sila si Marcelina Rota, Joan Buena ug Merlita Gocotano kinsa mipadayag sa ilang kakuyaw sa maong hitabo.
Apan gibati nila ang kaguol kay nawagtang na ang mga atop sa ilang panimalay ug langit na ang ilang nakita. (BANAT NEWS)