CEBU, Philippines - Magsuon gipamusil patay sa duha ka mga wala pa mailhing suspetsado samtang nag-inom uban sa mga silingan niini sa Sitio La Prueba, Barangay Duljo-Fatima, dakbayan sa Sugbo sa miaging gabii.
Si Jaymar Ibona, 24, ug ang manghud niini nga si Johnlee natusak-tusak sa bala ug patay nang nadangat sa Miller Hospital. Si Jaymar nakaangkon og samad pinusilan sa aping niini samtang si Johnlee daghang igo sa iyang buko-buko, dughan ug tuong abaga hinungdan sa kamatayon sa duha.
Si SPO4 Rey Cuyos, homicide investigator sa Cebu City Police Office (CCPO), mibutyag nga nag-inom ang mga biktima sa dihang naabot ang mga suspetsado nga pulos armado ug nagsul-ob og itom nga shorts ug nagmaskara og itom nga matud pa mura og attire sa Special Weapons and Tactics (SWAT).
“Nagtaptap og itom unya shorts nga itom kanang mura’g SWAT ug porma kuno,†matud ni Cuyos.
Apan ang kapulisan nagpabilin pang blanko sa hinungdan sa maong hitabo.
Si PO3 Nilo Aventurado, case investigator, nagkanayon nga posibleng personal nga bangi ang hinungdan sa maong pagpamanhig. “Ang usa (suspek) miingon man mao ni, mao ni sa wala pa sila pamusila,†matud niya.
Usa ka kabhang sa .45 nga pistol ang nakuha sa crime scene. Ang kapulisan misubay na kung si kinsa ang gikabangi sa managsuon sa wala pa ang hitabo. (BANAT NEWS)