CEBU, Philippines - Giandam sa kapolisan sa Presinto 2 sa Mandaue City Police Office ang kaso nga ilang ipasaka batok sa napilde sa pagka barangay konsehal sa Tipolo sa miaging piniliay nga suspetsado sa pagdunggab sa lima ka tawo .
Si SPO1 Michael Limalima sa kapolisan sa nahisgotang presinto mibutyag sa Banat News nga ang suspetsado nga si Ronie Villaflores, 40, taga Del Castillo Compound sa barangay Subangdaku, nagkagulkol na karon sa ilang detention cell.
Matud pa ni SPO1 Limalima nga ang mga biktima nga nadunggaban nagpabilin pa sa tambalanan ug padayon pa nga giatiman sa mga doktor.
Dugang pa ni SPO1 Limalima nga ang imbestigador sa maong insidente mohimo pa og dugang pakisusi sa pagsiguro sa kaso nga ilang ipasaka batok sa maong suspetsado nga giingong nakainom og ilimnong makahubog dihang nanunggab.
Si SPO1 Limalima miingon nga murag wa sa hustong pangisip ang suspetsado atol sa maong hitabo .
Nasuta nga bisan kinsa nga iyang gikasugat lakip ang iyang kaugalingon inahan giapil og luba ug nasamdan sa agtang.
Ang mga biktima nga nagpuyo ra usab sa Del Castillo compound sa barangay Subangdaku nga pulos samdan sa kutsilyo sa suspetsado mao sila si Joy Avila, 34, nagahab ang buko-buko, Catherine Branzuela, samdan usab sa buko-buko ug tiyan, ingon usab sila si Michael Urdaniza ug Rosendo Avila nga pulos samdan sa buko-buko.
Si Lydia Villaflores nga inahan sa biktima nga misulay sa pagpakalma sa maong suspetsado nakabaton usab og samad sa agtang dihang nakudlitan kini sa gidala nga kutsilyo sa suspetsado. (BANAT NEWS)