CEBU, Philippines - Usa ka lalaki nga nagduwa og mahjong nga gikatahong ex-convict ang gipusil patay sa wala pa mailhing lalaki sa sitio San Roque sa barangay Carreta sa dakbayan sa Sugbo pasado alas 6:00 sa miaging gabii.
Ang biktima naila nga si Socrates Monteron Garcia, 44, molupyo sa sitio Cahipa sa barangay Hipodromo ning siyudad.
Basi sa blotter nga natala sa Homicide Section nga ang biktima bag-o lang nahuman og mahjong ug nanghipos na kini sa petsas kauban sa tag-iya sa balay nga si Luzviminda Adiva.
Kalit lang nga misulod sa balay ni Adiva ang suspetsado ug mipusil sa biktima sa makausa ra ka higayon sa luyong bahin sa ulo ug nag-ambo kini sa lamesa ug patay na.
Ang suspetsado matud pa ni Adiva nga mura ra’g walay nahitabo nga milakaw gawas sa iyang balay sumala pa sa blotter ug misakay kini sa motorsiklo nga naghuwat sa gawas.
Ang maong killer gihulagway lang nga 5’5†ang gitas-on, sakto lang ang panglawas ug nagsul-ob og itom nga jacket ug itom nga helmet.
Sumala pa ni Chief Insp. Wildemar Tiu, hepe sa Waterfront Police Station nga nahinabi sa mga tigbalita nga nadawat sa iyang mga sakop nga nagbantay sa Carreta Cemetery ang daling miresponde sa dapit.
Apan wa na nila maabti ang gunman nga didto misulod sa sam-ang sa Ludo. Gikataho nga ang biktima nabilanggo na kaniadto tungod sa kaso sa ilegal nga drugas, wa pa matino ang motibo sa maong pagpatay. (BANAT NEWS)