Wa masayod sa kahulogan sa failure of elections?

CEBU, Philippines - Ang Cebu Provincial Police Office (CPPO) nagsugod na sa pag-imbestigar sa policewoman kinsa mideklarar og failure of election sa lungsod sa Catmon matud ni Cebu Provincial Police Office (CPPO) Director, Sr. Supt. Noel Gillamac.

Ang Provincial Investigation and Detective Management Branch (PIDMB) mimando na kang PO1 Mary Grace Marquez sa pagsumitir sa iyang explanation dili mulapas sa 48 oras ngadto sa buhatan sa CPPO.

Si Gillamac mitataw nga ilang sutaon kung tinuyo ba o dili ang gibuhat ni Marquez.

“Possible pud nga nakalitan lang siya sa pangutana sa media unya wala kaayo siya ka-grasp sa meaning sa failure of election,” matud ni Gillamac.

Siya midugang nga dili nila iapil si Catmon police chief, Sr. Insp. Jose Rovic Villarin sa imbestigasyon.  “No need na sa hepe. Sa policewoman ra,” matud niya.

Si Marquez padayon nga anaa sa Catmon Police Station samtang nagpadayun ang imbestigasyon.

Gisuwayan sa Banat News sa pagkuha sa iyang habig si Marquez apan wala kini sa buhatan kagahapon.

Adtong Lunes ang kapulisan ug ang Armed Forces of the Philippines miklaro nga walay ballot box snatching, presensiya sa armed troops ug harassment nga nahitabo sa Barangay Amancion, Catmon.

Si Philippine Navy Commander Anchises Diola miklaro nga usa lang ka gamay nga kasamok ang nahitabo.

Si Comelec Commissioner Maria Gracia Padaca miklaro nga ang failure of election ideklarar lang kung walay nakabotar sa usa ka polling precinct. Kung walay na-proklama ug adunay nahitabo nga pagbotar apan nahunong gumikan sa mga balido nga rason.

“There is no failure of election in the entire Central Visayas,” matud ni Padaca. (BANAT NEWS)