BFP molusad og awareness program

CEBU, Philippines -  Ang awareness program  ipatuman sa mga sakop sa Bureau Fire Protection (BFP)  atol sa kasaulogan  sa  Adlaw sa mga Kalag ug Adlaw sa mga Santos ugma  Nobiyembre 1 ug sa Sabado, Nobiyembre 2, niining tuiga.

Si Fire Chief Inspector Orlando Orbeta nga nahinabi sa mga tigbalita miingon nga ang fire awareness program nga ilang pasiugdahan maoy pahimangno sa molupyo sa kabarangayan nga mag-amping sa sunog atol sa duha ka adlaw  nga kasaulogan.

Si Orbeta miingon nga ilang pahinumdoman ang  publiko sa pagsiguro sa ilang panimalay sa dili pa molakaw sama sa pag-off sa plangka sa kuryente o pagsiguro nga walay nagsalida nga telebisyon, nag-andar nga electric fan o aircondition.

Dugang pa niya  nga  labaw  nga gipahinumdom  niya  sa katawhan  nga  likayan ang  pagdagkot og  mga  kandila  nga  dili  bantayan  sa maong mga adlaw.

Kini  tungod  kay  kun matumba o maupos mahimong makaingon   kini sa sunog.

Gitataw niya nga kini ang  mahitabo  sa matag higayon nga manglakaw  ang tibuok pamilya ug moadto sa mga sam-ang   nga  biyaan  lang  nga walay  tawo  nga  mahibilin  sa  ilang  mga  pinuy-anan.

Si Orbeta miingon nga himoon sa iyang mga sakop ang pagrikoreda ug  sa  hingpit nga   pagpahibalo sa   katawhan  nga  ampingan  ang  ilang pinuy-anan  nga  dili  maugdaw  ugma  ug  sa Sabado. (BANAT NEWS)