CEBU, Philippines - Duha ang patay human sila mabangga sa gikasugat nga minibus diha sa barangay Pitalo lungsod sa San Fernando kagahapon sa alas 6:00 sa buntag, ang angkas niini naligsan pa gyud sa nagsunod nga sakyanan.
Ang mga nakalas naila nga si Jason Torino, 25, ug si Mary Jane Milan, 20, pulos molupyo sa barangay Dagatan sa lungsod sa Badian.
Matud pa ni PO3 Julius Caesar Parages nga si Torino nagmaneho sa usa ka Honda Wave nga motorsiklo nga may plate number 73583 ug angkas niya si Milan.
Giingong mi-overtake si Torino sa usa ka motorsiklo ug sa usa ka sports utility vehicle (SUV) apan nakasugat kini sila og usa ka mini bus sa Chan Transit ug nabangga sa atubangan nga bahin sa maong mini bus nga may plate number GXT 109. Ang angkas ni Torino nga si Milan nalagpot tungod sa impact sa pagbangga apan didto mitugpa sa karsada ug nabanggaan sa nagsunod kanila nga SUV.
“Ni-overtake ni siya sa motor dayon sa Crosswind (SUV), nakasugat siya sa mini bus sa Chan Transit naigo ni niya, ang backrider nalabay sa pikas linya unya nadasmagan sa crosswind (SUV nga nagsunod),†matud pa ni Parages.
Patay diha-diha si Torino ug si Milan tungod sa grabeng kadaot nga naangkon niini sa lain-laing bahin sa ilang lawas.
Mitahan sa San Fernando Police Station ang drayber sa mini bus nga si Raymond Baclahan, 38 anyos ug molupyo sa dakbayan sa Carcar. Samtang sa Naga Police Station na mitahan ang drayber sa SUV nga si Rodrigo Fernandez, 45 anyos, molupyo sa lungsod sa Malabuyoc.
Matud ni Parages nga kasamtangang natanggong ang duha ka mga drayber ug gikatakdang pasakaan og kaso. (BANAT NEWS)