Comelec ug kapolisan sa Talisay andam na

CEBU, Philippines - Ang Comelec ug kapolisan sa dakbayan sa Talisay andam na sa eleksiyon sa barangay karong adlawa.

Si Talisay City Comelec assistant officer Anna-Lou Bacho mibutyag nga kagahapon  pa  nila  gi-andam  ang tanang mga polling precinct sa siyudad lakip ang mga Board of Election Tellers (BET) ug Board of Election Inspectors (BEI).

Hinuon   ang  problema  bahin  sa nangagubang  classroom  nasulbad usab dayon  pinaagi  sa pagbahin  sa matag  classroom  ngadto  sa duha  ka  mga presinto.

Ang Talisay gilangkoban  sa 22 ka mga barangay ug adunay 644   ka  presinto, ug  kapin  usab sa 300 ka mga clustered precinct.

Kagahapon maoy kataposang adlaw sa mga magtutudlo sa  pagsusi sa ilang mga supply sa election paraphernalia.

Karong adlawa  ang BET magtigom   sa alas 6:00  sa buntag, sa dili  pa  ablihan  sa alas 7:00  ang tanang mga polling precinct.

Dugang ni Bacho nga ang botasyon kutob  ra sa alas 3:00  unya  sa hapon.

Sa laing bahin, si Inspector Al Pascual, deputy chief sa Talisay City Police Station mibutyag  nga ang tanang police personnel gipa-report kagabii sa alas 12:00 sa tungang gabii  alang sa final briefing ug instructions.

Ang kapolisan magbutang  og police assistance center  sa mga dagkung polling place aron hapsay ang dagan sa pagbotar  ug  makatabang sila sa  pagsulbad  sa  mga problema nga motumaw  ilabi  na  sa  mga   dagkong polling place  sama sa  Poblacion, Tabunok  ug San Roque.

Ang mga polis nga   madestino  sa maong mga lugar gimanduan  sa  pag-report pinaagi sa text matag oras ngadto sa operation center aron mahibaw-an ang dagan sa eleksiyon.

Gawas niini adunay gitukod  nga reaction team sa matag usa  sa duha  ka  sektor   sa matag barangay.

Sa unang sektor, si Pascual maoy team leader   nga  naglangkob  sa  Poblacion, Cansojong, Tanke, Candulawan, San Roque, San Isidro, Tabunok, Bulacao, Biasong, Pooc, Mohon ug Dumlog.

Sa ikaduhang sektor, si Inspector Rodgene Fodutan maoy team leader  nga  naglakip sa Jaclupan, Lagtang, Lawaan I, II ug III, Linao, Maghaway, Campo 4 ug 6, Manipis ug Tapul. (BANAT NEWS)