CEBU, Philippines - Ang mga opisyal ug kawani sa Social Security Service (SSS) wala mahinayon sa ilang pagsaulog sa ilang tinuig nga family day nga gitakda kaniadtong Oktubre 19, 2013.
Matud pa ni Donald Montecillo, tigpamaba sa SSS nga kining tanan naggumikan sa linog nga miigo sa Sugbo ug Bohol sa milabay’ng Oktubre 15.
Miingon si Montecillo nga di sila makaako nga ang kaliboan nila ka membro sa Central Visayas nag-antos sa dagkong suliran ilabi na sa mga nawad-an og mga pinuy-anan.
May mga membro ang SSS sa Bohol nga nawad-an sa ilang mga minahal sa kinabuhi gumikan sa maong katalagman.
Hinungdan nga nagkasabot ang pamilya sa SSS dili na lang ihinayon ang ilang kasaulogan.
Gitataw ni Montecillo nga ang pundo nga gitagana sa ilang buhatan alang unta sa maong kalihukan, ila na lamang gigamit sa pagpamalit og mga canned goods, bugas ug uban pa ,alang sa mga nabiktima sa linog didto sa lalawigan sa Bohol. (BANAT NEWS)