CEBU, Philippines - Mokabat sa 80 ka mga sakop sa Philippine Air Force (PAF) ug 40 ka Field Training Policemen (FTP) ang ipakatap sa mga polling precinct atol sa barangay election sa dakbayan sa Lapulapu sa umaabot nga Lunes, Oct. 28 ning tuiga.
Matud pa ni Lapulapu City Police Office Director P/SSupt. Rey Lyndon Lawas nga 434 ka mga PNP personnel nga iyang mga sakop sa kapolisan sa dakbayan sa Lapulapu andam na sa ilang tagsa-tagsa ka destinasyon sa palibot sa dakbayan, ug sa isla sa Olango alang sa maong kalihukan.
Sa katapusang komunikasyon ni SSupt. Lawas nga iyang nadawat gikan sa PAF, giingong mopadala kini og 80 ka tawo alang sa augmentation force, apan posibleng makuhaan kini gumikan sa laing tahas nga ihatag sa Central Command ngadto sa mga sundalo.
Samtang 40 ka mga FTP ang ipahimutang sa mga polling precinct aron sa pag-monitor sa kahapsay ug kalinaw sa maong dapit.
Lakip sa mohatag og augmentation force sa kapolisan mao ang mga sakop sa Philippine Coast Guard ug Philippine Navy diin adto sila mag-monitor sa kadagatan ug sa isla sa Olango, sa panahon nga dad-on na sa mga sakop sa board of election tellers ang mga balota niini ngadto sa mga isla sa Olango.
Si Lawas miawhag sa mga Oponganons sa liquor ban nga sa umaabot Oct. 27 sa tungang gabii kay ila gyud nga sikopon ug imbargohon ang mga baligyang bino sa tindahan nga dili motuman sa balaod. (/WC) (BANAT NEWS)