Taxi ug PUJ obligadong mohatag diskuwento sa mga senior

CEBU, Philippines - Ang mga tag-iya’g taxi  ug jeep pasaheroan  gipahinumdoman ni Konsehal Gerardo Carillo nga kinahanglang mohatag gayud sila og 20 porsiyento nga diskwento sa pletehan sa mga senior citizens.

Si Carillo mihimo sa iyang awhag pinaagi sa usa ka resolusyon nga iyang giduso sa City Council ug gisuportahan usab sa iyang mga kauban nga konsehal.

Matud ni Carillo nga gawas sa nasudnong balaud, ang dakbayan sa Sugbo  aduna ‘say ordinansa nga naglatid nga ang mga drayber sa public utility vehicles kinahanglang mohatag gayud og diskwento sa mga seniors.

Ang opisina ni Carillo, kinsa maoy tsirman sa Committee on Social Services, nakadawat og daghang mga reklamo gikan sa mga senior citizens nga matud pa wala hatagi’g diskwento sa pagsakay nila og mga PUJ o taksi.

Matud ni Carillo nga ang mga senior citizens angayang mohatag lang og P6.40 nga plete ug dili P8.00 kun ang iyang rota ania ra sa dakbayan sa Sugbo.

Gawas sa diskwento sa plete sa mga public utility vehicles, ang mga senior citizens makakuha usab og diskwento sa ilang pagsakay og barko, pagpalit og makaon ug uban pa nga gastohan.

Hinuon, kun ang maong senior citizen adunay kauban sa pagkaon, dili ang tibuok nga kantidad maoy ibanan og 20 porsiyento nga diskwento kun dili ang bahin ra sa gikaon sa maong senior.

Pananglit duha sila nga mikaon sa usa ka kan-anan ug P500 ang ilang bayranan, ang P250 lang maoy makuhaan og 20 porsiyento nga nagpasabot nga hatagan ang senior og P50 nga diskwento. –/WC (BANAT NEWS)