Puya nga gilabay nabaho na

CEBU, Philippines - Patay ug  baho  na  ang  usa  ka puya nga napalgan sa mga bata  human kini ilabay sa  inahan  nga wala  hiilhi  didto Minglanilla Public Cemetery sa Poblacion Ward III sa lungsod sa Minglanilla sa ala 1:00  sa hapon sa miaging adlaw.

Si PO1 Wilmer Campo nga nahinabi sa Banat News miingon  nga usa ka karton ang gisudlan sa maong bag-ong  natawo nga bata nga gisulod  usab sa usa ka plastic bag.

Giukban   sa usa sa mga residente nga nagpuyo duol sa sementeryo ang maong karton ug mao na lay nakit-an nila nga  porma og bata ang  nabaho.

Busa mitaho gilayon sila sa kapolisan ug  dihang  mirespondi ang kapolisan pinangulohan ni PO2 Humprey Alpas  giablihan niya ang maong karton ug nasuta nga usa ka puya ang  sulod niini.

Daling gidala sa grupo ni PO2 Alpas ang karton ngadto sa Health Center sa Minglanilla ug nasuta nga usa ka lalaki ang puya ug lima na kini ka buwan.

Human masusi ang maong puya gidala kini sa simbahan sa Minglanilla aron mabindisyonan ug gilubong gilayon sa sementeryo diin kini napalgan.

Nagtuo ang kapolisan nga nagpuyo ra sa duol  sa sementeryo ang inahan sa maong puya. Matud pa ni PO1 Campo nga susihon sa mga sakop sa health center ang tanang mga mabdos sa maong lugar aron mailhan kung kinsa ang inahan sa  puya nga gilabay. (/WC) (BANAT NEWS)