Kampanya sa election kutob ra unya alas 12:00

CEBU, Philippines - Ang tanang mga kandidato dili na tugotan nga makapangampanya lapas sa alas 12:00 unyang tungang gabii.

Matud ni Comelec Regional Director Temie Lambino nga matapos na karong gabii ang siyam ka adlaw nga pagpangampanya alang sa mga kandidato sa eleksyon sa barangay unya sa Lunes.

Kadtong mga kandidato nga masakpang molapas niining maong pagdili sa Comelec mahimong mag-atubang og kaso kun adunay mobarug sa paghimo nila og salaud.

Dinhi sa dakbayan sa Sugbo lang adunay dul-an sa duha ka libo ka kandidato pagka kapitan ug konsehal sa 80 ka barangay.

Ang tibuok Central Visayas adunay 3,003  ka barangay.

Sugod usab unyang tungang gabii, did-an na ang pag-inum-inom sa mga publiko nga lugar kay gani bisan ang pagbaligya og mga ilimnon nga makahubog dili na itugot.

Kabahin kini sa pagpaninguha sa Comelec nga mahimong hapsay ug dili gubot ang eleksyon sa barangay.

Si Cebu City Election Officer Marchel Sarno miawhag sa mga botante nga mosayo pagbotar og dili paabuton ang pag-abot sa kahaponon aron makasugod dayon pag-eskutinyo sa mga botos human sa botasyon.

Ang pagdeklarar sa mga mananaug anha ra himoa sa masig ka barangay diin adunay pagamugnaon nga Board of Election Canvassers.

Nalipay ang mga opisyal sa Comelec nga hangtud karon wala sila makadawat og report kabahin sa kagubot nga mugna sa mga nagkabangi nga mga kandidato. – Rene U. Borromeo/WC

Building sa Talisay City hall lig-on–Bacasmas

Si Talisay City Engineer Audie Bacasmas mibutyag nga base sa ilang gipahigayong inspection ang building sa Talisay City hall, lig-on  nga  pagkatukod.

Kini   human mamalhin  sa likod  sa  maong  edipisyo   ang  mga  kawani  sa city hall  sa kabalaka  nga  malusno  kini  human  sa 7.2 magnitude nga linog  niadtong  miaging  semana.

Nakita  nila  ang  mga  liki  sa bongbong  ug  ang  pagkatagak   sa kisame  sa maong  building  hinungdan  nga  nangalisang  ang  mga  kawani. Sa kabalaka  nga  may  madisgrasya  gumikan sa padayong  aftershocks,  ang  kagamhanan  mitugot  nga  magtolda  ang  mga  kawani  nga  modawat  sa  mga  transaksyon  sa publiko    sa likod  sa building.

Apan niadtong Huwebes  mibalik na sa normal ang operasyon  sa sulod sa city hall.

Si Bacasmas nga nahinabi sa Banat News nagkanayon   nga  lig-on  kaayo  ang  pagkatukod  sa city hall  building  ug  ang  mga  liki  nga  makita  sa bongbong  niini  gagmay  kaayo  nga  dili  sarang  makatandog  sa pundasyon  sa edipisyo. Gipasabot ni Bacasmas nga ang mga makitang liki  sa bongbong sa city hall  nagsubay lamang  sa mga pinatong  nga hollow  block.

Apan matud sa city engineer ang labing importante nga ang main structure sa building  nga naglangkob   sa  mga haligi  ug   mga beam wala  manliki.

Apan kung dunay makitang  liki sa  main structure  ug  mangahiwi  na  ang reinforcement o  mga  dagkong  kabilya,  mao kanay delikado. Gipasabot usab ni Bacasmas nga ang city hall building gidesinyo  nga  adunay kapasidad nga makasugakod sa magnitude 8 nga linog.

Ang building sa city hall gisugdan  sa pagtukod niadtong tuig 2002 ug naukopahan kaniadtong tuig 2004.

Giklaro ni Bacasmas nga pagkahuman sa linog ,siya uban nila ni Engineer Gamaliel Vicente ug Engineer Ariel Araw-araw uban sa personnel sa Talisay City Fire Station misulod dayon  sa building ug misusi sa sitwasyon.

Matud niya nga sa ilang assessment walay angayang kabalak-an apan nagkinahanglan man  nga makasiguro, hinungdan nga  nagpatabang  sila  sa mga  pribadong structural engineers alang sa second opinion.

Gibutyag usab ni Bacasmas nga sama sa ilang assessment ang gibutyag usab sa  structural engineer nga walay angayang kabalak-an tungod kay lig-on ang building sa city hall.

Ang city engineer nagkanayon nga aron makasiguro labing maayo nga butangan og retro000fitting ang mga dapit  sa city hall tungod kay natay-og na kini sa mga linog nga miagi ug gawas niini  adunay daghang nadugang nga mga pasilidad sama sa computer diha sa city hall ug nagkadaghan usab ang mga tawo nga magpundo sa building. Dugang ni Bacasmas nga naghuwat pa sila sa report sa mga structural engineer   kay ila usab kining ipaubos sa evaluation kung asa dapit  ang butangan og retro fittings. (/WC) (BANAT NEWS)