CEBU, Philippines - Birhen sa Sto. Rosario giingong nagmilagro human ang imahen niini milingi sa tuo nga nag-atubang sa probinsya sa Bohol nga maoy sentro sa 7.2 magnitude nga linog nga mikalas na og dul-an 200 ka tawo.
Matud pa ni Bebe Quiroga, 63 anyos, usa ka Parish Pastoral Council Worship Committee nga gikahinabi sa Banat News, usa ka milagro kay sa wala pa ang linog niadtong Oktubre 15 wala man kini maglingi ug normal lamang kini. “Nakamatngon mi nga nalahi na man ang nawong sa Mahal nga Birhen.. straight ra man ni iyang nawong pero karun naglingi na,†matud niya. Tungod niini, midugok na ang mga tawo sa ilang simbahan.
Sumala pa niya wala maunsa ang imahen atol sa linog diha sa gitungtongan niining lamesa duol sa altar. Matod niya ila kining gipagawas sa estante tungod kay buwan man karon sa rosaryo. Matud niya ilang parish priest nga si Fr. Peter Monteron wala kini karon sa simbahan kay duna kini recollection nga gitambungan apan napahibalo na nila kini bahin sa kausaban sa imahen.
Sumala pa niya ilahang gisuwayan pagliso og balik ang ulo apan wala sila makapiog niini. Ang maong imahen ilang nakuha niadtong 1980.
Samtang si Russell Guardiana, 21, presidente sa Parish Youth Coordinating Council mibutyag nga ikaduha na kining higayon nga milingi ang imahen. Matud niya nga ang una matod pa nahitabo niadtong Oktubre 15 paghuman sa linog apan nahibalik ra kini sa normal pagkasunod adlaw.
Apan kagahapon, ila na usab nabantayan nga milingi na kini sa direksyon sa Bohol. Ang iyang pamahayag gidasonan ni Samantha Delarita, 19, nga aktibo usab sa mga kalihokan sa simbahan.
Matud ni Delarita nga dunay bata kagahapon sa buntag nga nakakita sa usa ka babaye nga nagsuot og puti nga sapot ug giingnan ang bata nga paablihan ang simbahan kay dunay daghang mangabot nga bisita.
Tungod sa kadaghan sa mga tawong gustong makahikap sa imahen, gibutang sila si PO1 Madrid Aparre ug SPO1 Jared Llenos sa Alcantara Police Station kagahapon sa buntag.
Matud pa nga si Vice-Mayor Beatrice Caburnay mitawag sa police station ug nangayo og police aron bantayan ang imahen tungod kay ang mga tawo gusto nang mogakos sa imahen.
Usa ka deboto nga si Elizabeth Tabanaw nga taga Moalboal nagkanayon nga pagkadungog niya sa maong balita dali siya nga miadto sa simbahan aron mag-ampo. Matud niya ala 1:00 siya naabot sa simbahan ug taas kaayo ang linya ug around 3:00 p.m. wala pa siya makaduol sa maong imahaen.
Apan si Fr. Herardo dela Victor sa Ginatilan miingon nga ang maong paglingi sa imahen kinahanglan pang imbestigahon ug dili pa angayang isipong usa ka milagro.
Apan sa iyang personal nga opinyon, daw pagpahinumdom kini sa tawo kung diin kini maggikan ug kung asa mosangpit. Usa si Fr. Dela Victor sa miadto sa simbahan human siya nakuryoso. (BANAT NEWS)