Kapolisan gipakatap sa Olango

CEBU, Philippines - Gipakatap na ang kapolisan sa dakbayan sa Lapulapu ngadto sa isla sa Olango isip "advance party" alang sa siguridad sa tulo ka mga gagmay’ng isla nga layo ra sa buhatan sa kapolisan.

Matud pa ni Lapulapu City Police office Director P/SSupt. Rey Lyndon Lawas  nga ang mga barangay sa isla sa Pangan-an, Cauhagan ug Cao-oy layo  sa police station sa isla sa Olango hinungdan nga iya kining gipadad-an og mga PNP personnel.

Hinuon gipadayag ni SSupt. Lawas nga wala maapil ang Brgy. Cao-oy ug Cauhagan sa ilang areas of concern gawas sa Brgy. Pangan-an nga adunay kasaysayan sa mainitong panagribal sa mga kandidato.

Samtang ang mga sakop sa Phil. Air Force, karong Sabado pa kini ipakatap sa ilang labaw human sa himoong send off ceremony sa dili pa kini idestino sa ilang tagsa-tagsang assignment.

Sa mainland Lapulapu lima ka barangay ang ilang gihatagan og hugot nga pag-monitor gumikan sa panagribal sa mga kandidato niini.

Lakip sa ilang gi-monitor mao ang Brgy. Punta Engano, Agus, Pajo, Pusok ug Ibo diin sa milabay’ng piniliay 2010 init  kaayo ang panagribal sa mga kandidato sa maong mga lugar.

Gimanduan usab ni Lawas ang iyang mga police station chiefs sa paghimo og covenant sa tanang kandidato alang sa hapsay ug malinawon nga piniliay. (BANAT NEWS)