Babayeng nagsabak nadasmagan sa motor patay

CEBU, Philippines - Patay ang usa ka  nagsabak human  kini  madasmagi  sa usa ka  motorsiklo sa dalan nasyonal sa barangay Canamocan, lungsod sa Compostela  sa miaging alas 6:00 sa buntag.

Ang namatay mao si Jocelyn Padora Borja, 41 , nga may kapuyo,  lumad nga taga Lanao del Sur  ug kasamtangan nga nagpuyo sa barangay Canamocan , ug  nagtrabaho sa noodles  factory nga nahimutang usab  sa maong dapit.

Ang nakadasmag mao ang Honda nga motorsiklo nga gimaneho  ni Jimmy Bitoon Pareja, 25, minyo, nga nagpuyo sa barangay Basak sa nahisgotang lungsod.

Si PO1 Jaime Marolenia nga maoy imbestigador  sa buhatan sa trapiko sa kapolisan sa maong lungsod nga nahinabi sa Banat News miingon nga migawas lamang sa makadiyot gikan sa pabrika nga iyang gitrabahoan ang  biktima kay mopalit og sud-an.

Apan  samtang  naglakaw  kini kalit  lang  gidasmagan sa naghaguros nga motorsiklo  ni Pareja.

Matud pa ni PO1 Marolenia nga nalamba  sa sementadong karsada  nga nakaingon usab sa grabeng kadaut sa lawas nga naangkon niini.

Si PO1 Marolenia miingon  nga gihatod sa mga molupyo sa maong dapit ang biktima ngadto sa Danao Provincial Hospital apan gideklarar kini sa mga doktor nga dead on arrival.

Matud pa ni PO1 Marolenia nga si Pareja human  matambali  sa mga  pangus  niini  sa lawas  ilang  gitanggong sulod sa ilang detention cell. (/WC) (BANAT NEWS)